مرقس دی انجیل

۱۔ خدا دے بیٹے یِسُوع مسیح دی انجیل دا شروع۔
۲۔ جہا یشعیاہ نبی دی کتاب وچ لکھیا ہے۔ پئی ویکھو میں اپنے رسول نُوں تیرے اَگے گھلنا ہاں۔ اُہ تیرا راہ بناوے گا۔
۳۔ جنگل وچ اک ہوکا دین والے دی ا ٓواز پئی خُداوند دے راہ نُوں تیارکرو۔ تے اُہدے رستیاں نُوں سِدّھیاں کرو۔
۴۔ یوحناآیا۔ جہڑا جنگل وچ بپتسمہ دیندا تےگناہاں دی معافی دے لئی توبہ دے بپتسمہ دی منادی کردا سی۔
۵۔ تے یہودا دا وسارا دیس تے یروشلیم دے سارے رہن والے اُہدے کول لگے آوندے سان۔ تے اُہناں اپنے گناہاں نُوں من کے یردن ندی وچ اہدے ہتھوں بپتسمہ لیا۔
۶۔ تےیوحنا اُوٹھ دے والاں دی پوشاک پاندا سی تے چم دی پیٹی اُہدے لک دوالے سی۔ تے ٹڈیاں تے جنگل دا شہد کھاندا سی۔
۷۔ تے اوہ منادی کردا سی۔ پئی میرے پچھے اک میتھوں طاقت والا آوندا ہے۔ تے میں نیؤں کے اہدی جتی دی گھنڈی کھولن دے لائق نہیں۔
۸۔ میں تہانُوں پانی نال بپتسمہ دتا ہے۔ پر اہ تہانُوں پاک روح نال بپتسمہ دیوے گا۔
۹۔ تے اہنیں دنیں ایوں ہویا پئی یِسُوع گلیل دے ناصرت تُوں آیا تے یردن وچ یوحنا دے ہتھوں بپتسمہ لیا۔
۱۰۔ تے روح پانیوں نکلدیاں ساراوس اَسماناں نُوں کھلدایاں تے روح نُوں کبوتروانگوں اپنے اُتے اتردیاں ڈٹھا۔
۱۱۔ تے اَسمانُوں اک آواز آئی۔ پئی تُوں میرا پیار بیٹا ہیں۔ تیھتُوں میں راضی ہاں۔
۱۲۔ تے روح نے اونویں جنگل ول اہنُوں گلیا۔
۱۳۔ تے جنگل وچ چالی دن شیطان اُہنُوں ازماندا رہیا۔ تے اوہ جنگلی جانوراں دے نال رہندا سی تے فرشتے اُہدی ٹہل کردے سان۔
۱۴۔ تے یوحنادے پھڑے جان پچھوں یِسُوع خدا دی انجیل دی منادی کردا تے اِہ آکھدا گلیل وچ آیا۔
۱۵۔ پئی ویلا آگیا ہے تے خدا دی بادشاہی نیڑے آئی۔ توبہ کرو۔ تے انجیل نُوں منو۔
۱۶۔ تے گلیل دے سمندر دے کنڈھے اُتے پھردیاں اوس شمعون تے شمعون دے بھرااندریاس نُوں سمندر وچ جال پاوندیاں ڈٹھا۔ کیوں جو اہ مچھیاں دے شکاری سان۔
۱۷۔ تے یِسُوع نے اُہناں نُوں آکھیا۔ میرے مگرٹرے آو تے میں تُہانُوں آدمیاں دے پھڑن والے بناواں گا۔
۱۸۔ تے اُہ جھٹ جالاں نُوں چھڈ کے اہدے مگر ٹرپئے۔
۱۹۔ تے تھوڑی دور اگے ودھ کے اوس زبدی دےپتر یعقوب تے اہدے بھرا یوحنا نُوں ویکھیا۔ پئی اُہ بیڑی وچ جالاں نُوں سدھار دے سان۔
۲۰۔ اونویں اُہناں نُوں سدیا تے اُہ اپنے پیو زبدی نُوں بیڑی وچ کامیاں دے نال چھڈ کے اُہدے مگرٹرپئے۔
۲۱۔ تے اُہ کفر ناحم اپڑے تے اُہ اوسے ویلے عبادت خانے وچ جا کے تعلیم دین لگا۔
۲۲۔ تے اُہ اُہدی تعلیم تھوں حیران ہوئے کیوں جو اُہ اُہناں نُوں فقیہاں وانگوں نہیں پر اختیار والے وانگوں تعلیم دنیدا سی۔
۲۳۔ تے اوسے وایلے اُہناں دے عبادت خانے وچ اک جنا سی۔ جہنُوں پلیت روح چمبڑی ہوئی سی۔ تے اوس اُچی آواز نال آکھیا۔ پئی۔
۲۴۔ اے یِسُوع ناصری۔ تیرا ساڈے نال کیہ واسطہ۔ تُوں ساڈا ناس کرن آیا ہیں۔ میں تینُوں جانناں۔ پئی تُوں کون ہیں۔ خدادا قدوس ؟
۲۵۔ تے یِسُوع اہنُوں ورج کے آکھیا۔ چپ رہ تے اِہدے وچوں نکل جا۔
۲۶۔ تدپلیت روح اُہنُوں مروڑ کے تے چیکاں ماردی اُہدے وچوں نکل گئی۔
۲۷۔ تے سارے لوک ایڈے حیران ہوئے پئی آپو وچ چرچا کرن لگے پئی اِہ کیہ ہے ؟اک نویں تعلیم پئی اُہ پلیت روحاں نُوں بھی اختیار نال حکم کرداہے۔ تے اُہ اہنُوں من لیندیاں نے۔
۲۸۔ اونویں ئی گلیل دے سارے علاقے وچ اُہدی دھم پے گئی۔
۲۹۔ اُہ اوسے ویلے عبادت خانیوں باہر جاکے یعقوب تے یوحنا نال شمعون تےاندریاس دے گھر آئے۔
۳۰۔ تے شمعون دی سس کس نال پئی ہوئی سی۔ تے اہناں نے جھٹ اہنُوں اُہدی خبر دِتّی۔
۳۱۔ تے اوس کول آکے اُہنُوں ہتھوں پھڑ کے اُٹھا لیا تے اُہدی کس لہ گئی۔ تے اوس اُہناں دی ٹہل کیتی۔
۳۲۔ شام دے ویلے جد سورج ڈُب گیا۔ ساریاں بیماراں نُوں تے جہناں نُوں بدروحاں دا سایہ سی اُہدے کول لیائے۔
۳۳۔ تے سارا شہر بوہے اُتے اکٹھاہویا سی۔
۳۴۔ تے اوس بہتیاں نُوں جِہڑے وکھو دکھ بیماریاں وچ پئے سان ول کیتا۔ تے بہتیریاں بدروحاں کڈھ دیتاں۔ تے بدروحاں نُوں بولن نہ دِتّا۔ کیوں جو اُہناں اُہنُوں پچھان لیا سی ۔
۳۵۔ تے اُہ بڑے سویرے کجھ رات رہندیاں اُٹھیا۔ تے باہر نکل کے اک اُجاڑ تھاں وچ گیا۔ تے اوتھے دُعا منگی۔
۳۶۔ تے شمعون تے اُہدے ساتھی اہدے پچھے گئے۔
۳۷۔ جد اُہناں اُہنُوں لبھ لیا۔ تاں اُہنُوں آکھیا پئی تینُوں سبھے بھالدے نے۔
۳۸۔ تے اوس اہناں نُوں آکھیا۔ آؤ ہور کتے نیڑے دے شہراں وچ چلئے پئی میں اوتھے بھی منادی کراں۔ کیوں جو میں ایسے لئی نکلیا۔
۲۹۔ تے اُہ سارے گلیل وچ اُہناں دے عبادت خانیں منادی کردا تے بدروحاں نُوں کڈھدا آیا۔
۴۰۔ تے اک کوڑھا اہدے کول آیا۔ تے اُہدی منت کر کے اُہدے اگے گوڈے نوا کے آکھیا۔ جے تُوں چاہیں تاں مینُوں پاک صاف کر سکدا ہیں۔
۴۱۔ تےاوس ترس کھاکے اپناہتھ ودھایا۔ تے اُہنُوں چھویا۔ تے آکھیا۔ میں چاہناں تُوں پاک صاف ہوجا۔
۴۲۔ تے اونویں اُہدا کوڑھ جاندا رہیا تے اوہ پاک صاف ہوگیا۔
۴۳۔ تد اوس اُہنُوں تاکید کر کے اوسے ویلے ٹور دِتّا۔
۴۴۔ تے اُہنُوں آکھیا۔ ویکھ ! تُوں کسے نُوں کجھ ناں دسیں۔ پر جاتے اپنا آپ کاہن نُوں وکھا تے اوہ چڑھاوا جہدا موسیٰ نے حکم کیتا اپنے پاک ہون دی بابت چاڑھ۔ تاں جو اُہناں لئی گواہی ہووے۔
۴۵۔ پر باہر جاکے اوس بہت بولن تے ایس گل نُوں ایڈا مشہور کرنا شروع کیتا۔ پئی یِسُوع پھیر شہروچ کھلم کھلا وڑنہ سکیا۔ پر باہر اُجاڑ تھانواں وچ رہیا۔ تے لوک چو پھیریوں اُہدے کول آوندے ہُندے سان۔

۱۔ تے کیاں دناں پچھوں جاں اُہ کفرناحم وچ پھیر آیا۔ تاں سُنیا گیا سی پئی اُہ گھر وچ ہے۔
۲۔ تے اپنے لوک اکٹھے ہوئے پئی بوہے دے اگے بھی تھاں نہ رہیا تے اوس اُہناں نُوں کلام سنایا۔
۳۔ تے اُہ اک جھولے دے مارے ہوئے نُوں چونہہ آدمیاں کولوں چُکوا کے اُہدے کول لیائے۔
۴۔ تے جد اُہ بھیڑ دے سبب کر کے اُہدے نیڑے نہ آسکے۔ تد اُہناں اوس چھت وچ جِھتے اہ سی مگھد کیتا۔ تے جاں کے اُہنُوں اُدھیڑ چکے تاں اوس منجی نُوں جہدے اُتے جھولے دا ماریا ہویا پیا سی اُتار دِتّا۔
۵۔ تے یِسُوع اُہناں دا ایمان ویکھ کے اوس جھولے دے مارے ہوئے نُوں آکھیا۔ بچّا! تیرے گناہ معاف کیتے گئے۔
۶۔ پر کئی فقیہ اوتھے بیٹھے اپنے من وچ وچار کردے سان پئی۔
۷۔ اِہ کیوں ایس طرح بولدا ہے ؟ کفر بکدا ہے۔ خدادے بناں کون گناہ معاف کر سکدا ہے ؟
۸۔ تےاونویں ئی یِسُوع اپنےروح نال معلوم کر کے پئی اُہ اپنے مناں وچ ایوں وچار کردے نے۔ اُہناں نُوں آکھیا۔ تُسِیں کاہنوں اپنے دل وچ اجہی وچار کردے ہو؟
۹۔ ایس جھولے دے مارے ہوئے نُوں کیہ آکھنا سکھالا ہے۔ اِہ پئی تیرے گناہ معاف ہوئے یاں اِہ آکھنا۔ پئی اٹھ تے اپنی منجی چک تے ٹر جا؟
۱۰۔ پر ایس لئی پئی تُسِیں جانو۔ پئی ابن آدم نُوں زمین اتے گناہ معاف کرن دا اختیار ہے۔ اوہن اوس جھولے دے مارے ہوئے نُوں آکھیا۔
۱۱۔ میں تینُوں آکھنا ہاں۔ اٹھ اپنی منجی چک کے اپنے گھر نُوں ٹرجا۔
۱۲۔ تے اُہ اُٹھیا تے منجی چھیتی نال چک کے اُہناں سنبھناں دے سامنے نکل گیا۔ تد سارے حیران ہوگئے۔ تےخدا دی وڈیائی کر کے آکھن لگے پئی اساں ایس طرح دی گل کدی نہیں ویکھی۔
۱۳۔ تے اُہ پھیر سمندر دے کنڈھے اُتے گیا تے ساری بھیڑ اُہدے کول آئی۔ تے اوس اُہناں نُوں تعلیم دتّی۔
۱۴۔ تے جاندے ہوئے اوس حلفی دے پتر لیوؔی نُوں محصول دی چونکی اتے بیٹھاں ویکھیا۔ تے اہنُوں آکھیا۔ پئی میرے پچھے ٹرآ۔ سو اُہ اُٹھیا تے اہدے پچھے ٹر پیا۔
۱۵۔ تے ایوں ہویا پئی جاں اُہدے گھروچ روٹی کھان بیٹھا۔ تاں بہت سارے محصولئے تے گہنگار یِسُوع تے اہدے شاگرداں نال بہہ گئے۔ کیوں جو اہ بہت سارے سان اہدے مگر ٹر آئے سان۔
۱۶۔ تے جد فریسیاں دے فقیہاں نے اُہنوں محصولیاں تے گنہگاراں نال کھاندیاں ویکھیا۔ تد اُہدے شاگرداں نُوں آکھیا پئی اُہ محصولیاں تے گنہگاراں دے نال کھاندا پیندا ہے۔
۱۷۔ تے یِسُوع سن کے اُہناں نُوں آکھیا پئی نویں نرویاں نُوں حکیم نہیں لوڑیدا پر روگیاں نُوں لوڑ ہے۔ میں نیکاں نُوں بُلان نہیں آیا پر گُنا ہیاں نُوں۔
۱۸۔ تے یوحنا دے شاگرد تے فریسی روزہ رکھدے سان۔ تےاُہناں آکے اُہنُوں آکھیاں پئی یوحنا دے شاگرد تے فریسیاں دے شاگرد کیوں روزہ رکھدے نے۔ پر تیرے شاگرد نہیں رکھدے ؟
۱۹۔ تےیِسُوع اُہناں نُوں آکھیا۔ پئی جد تیکر لاڑا جا نجیاں دے نال ہے۔ اُہ روزہ رکھ سکدے نے ؟
۲۰۔ پر اُہ دن آون گے جد لاڑااُہناں تھوں اَڈکیتا جائے گا۔ تد اوس دن اُہ روزہ رکھن گے۔
۲۱۔ پر انے کپڑے نُوں کورے کپڑے دی ٹاکی کوئی نہیں لاندا۔ جے لاوے بھی تاں اُہ لائی ہوئی ٹاکی اوس تھوں کجھ کھچ لیندی ہے (یعنے نویں پرانے تھوں ) تے لنگار ودھ جاندا ہے۔
۲۲۔ تے نویں انگور دی رس نویں پُرانیاں مشکاں وچ کوئی نہیں بھردا۔ جے بھرے بھی تاں رس مشکاں نُوں پاڑ دے گا۔ تےانگور دی رس تے مشکاں دوہاں دا ناس ہو جاندا ہے۔ پر نویں انگور دی رس نُوں نویاں مشکاں وچ بھردے نے۔
۲۳۔ تے ایوں ہویا پئی اُہ سبت دےدن پیلیاں وچوں دی لنگھیا۔ تے اُہدے شاگرد راہ وچ سٹے توڑن لگے۔
۲۴۔ تے فریسیاں نے اُہنُوں آکھیا۔ ویکھاں اُہ سبت دے دن کیوں اِہ کم کر دے نے جہدا کرنا روا نہیں ہے ؟
۲۵۔ تے اوس اہناں نُوں آکھیا۔ تساں کدی نہیں پڑھیا پئی جاں داؤد نُوں لوڑپئی۔ تے اُہنُوں تے اہدے ساتھیاں نُوں بھکھ لگی۔ تاں اوس کیہ کیتا۔
۲۶۔ پئی اُہ کس طرح سردار کاہن ابیا تردے سمے خدا دے گھر وچ گیا۔ تےچڑھاوے دیاں روٹیا ں کھالیاں۔ جہناں دا کھاناں کاہناں دے بناں ہور کسے نُوں روا نہیں سی۔ تے اپنے ساتھیاں نُوں بھی دتیاں ؟
۲۷۔ تے اوس اہناں نُوں آکھیا۔ پئی سبت دا دن انسان دی خاطر۔ بنیا ہے۔ نہ انسان سبت دی خاطر۔
۲۸۔ ایس لئی ابن آدم سبت دے دن دا بھی خداوند ہے۔

۱۔ تے اُہ عبادت خانے وچ پھیر گیا۔ تے اوتھے اک جنا سی جہدا ہتھ سکا ہویا سی۔
۲۔ تے اُہ اُہدی تاک وچ لگے ہوئے سان۔ پئی جیکر اُہ سبت دے دن اُہنُوں ول کرے تاں اسیں اُہدے اُتے نالش کرئے۔
۳۔ تے اوہن اوس جنے نُوں جہداہتھ سکا ہویا سی آکھیا۔ پئی وچکار کھلو جا۔
۴۔ تد اوس اُہناں نُوں آکھیا۔ سبت دے دن بھلے کم کرنے روا نے۔ یا برے کم ؟جان بچانی یا جان مارنی ؟پر اُہ چپ ئی کر رہے۔
۵۔ تد اوس اُہناں دی سخت دلی دے سبب اداس ہو کے غصے دی نظر نال اہناں ول ویکھیا تے اوس آدمی نُوں آکھیا اپنا ہتھ ودھا۔ تے اوس ودھایا تے اُہدا ہتھ ٹھیک ہوگیا۔
۶۔ تد فریسیاں باہر جا کے اوسے ویلے ہیرودیاں نال اُہدے برخلاف صلاح کیتی پئی کِیکر اُہنُوں مار سٹے۔
۷۔ تے یسوع اپنے شاگرداں سنے سمندر ول ٹر گیا تے گلیل تھوں بڑی خلقت مگر ٹرپئی۔
۸۔ تے یہودیہ تے یروشلیم تے ادوم تے یردن دے پاروں تے صور تے صیدا دے آلے دوالیوں بھی اک بڑی بھیڑ اِہ سن کے پئی اُہ کیڈے وڈے کم کردا ہے اُہدے کول آئی۔
۹۔ تے اوس اپنے شاگرداں نُوں آکھیا پئی بھیڑ دے سبب اک بیڑی میرے لئی تیار رہے پئی لوک مینُوں تنگ نہ کرن۔
۱۰۔ کیوں جو اوس بہتیاں نُوں ول کیتا سی۔ ایتھوں توڑی پئی جنے لوک سخت بیمارسان اُہنوں چھوہن لئی اُہدے اُتے ڈگدے جاندے سان۔
۱۱۔ تے پلیت روحاں جد اُہنوں ویکھدیاں سان اُہدے اَگے ڈگ پیندیاں سان تے چیکاں مار کے آکھدیاں سان۔ تُوں خدا دا بیٹا ہیں۔
۱۲۔ تے اوس اُہناں نُوں بڑی تاکید کیتی پئی مینُوں مشہور نہ کرن۔
۱۳۔ پھیر اوس اک پہاڑ اُتے چڑھ کے جنہاں نُوں آپ چاہندا سی اہناں نُوں کول سدیا۔ تے اُہ اُہدے کول گئے۔
۱۴۔ تے اوس بارھاں نُوں مقرر کیتا پئی اُہدے نال رہن۔ تے اہ اہناں نُوں گھلے۔ پئی منادی کرن۔
۱۵۔ تے نالے بدروحاں نُوں کڈھن دی قدرت رکھن۔
۱۶۔ تے اوس شمعون دا ناں پطرس بھی رکھیا۔
۱۷۔ تے زبدی دا پتر یعقوب تے یعقوب دا بھرا یوحنا۔ جہناں دوہاں دا ناں بونرگیس یعنے گرج دے پُتر رکھیا۔
۱۸۔ تے اندرس تے فلپس۔ تے برتلمائی تے متی۔ تے توما تے حلفائی دا پتر یعقوب تے تدی۔ تے شمعون غیرتی۔
۱۹۔ تے یہودا اسکریوطی جس اہنُوں پھڑوا بھی دتا۔
۲۰۔ تے اہ گھر آیا۔ تے اینی بھیڑپھیر اکٹھی ہوئی پئی اُہ روٹی بھی نہ کھا سکے۔
۲۱۔ جد اُہدے ساکاں اِہ حال سُنیا تد اُہنوں قابو کرن لئی نکلے۔ کیوں جو اُہناں آکھیا پئی اہ سودائی ہے۔
۲۲۔ تے فقیہ جِہڑے یروشلیم تھوں آئے سان آکھن لگے پئی اُہ بعلز بول ملیا ہویا ہے۔ تے بدروحاں دے سردار دی مدّدتال بدروحاں نُوں کڈھدا ہے۔
۲۳۔ اوس اُہناں نُوں کول سد کے تمثیلاں وچ آکھیا پئی شیطان نُوں کِیکر کڈھ سکدا ہے ؟
۲۴۔ تے جیکر کسے راج وچ پھٹ پے جاوے۔ تاں اُہ راج قائم نہیں رہ سکدا۔
۲۵۔ تے جے کسے گھر وچ پھٹ پے جاوے تاں اُہ گھر قائم نہ رہ سکے گا۔
۲۶۔ تے جے شیطان اپنے ہی مقابلے اُتے اٹھ کھلوو ے۔ تے اُہدے وچ پھٹ پے جاوے تاں اُہ قائم نہیں رہ سکدا۔
سگوں اُہدا اوڑک ہُندا ہے۔
۲۷۔ پر زور آور آدمی دے گھر وچ کوئی اہدا اسباب لٹن لئی وڑ نہیں سکدا جد تیکر پہلاں اوس زور آور نُوں بنھ نہ لوے۔ تدے اُہ اُہدا گھر لُٹے گا۔
۲۸۔ میں تہانُوں سچ آکھنا ہاں پئی بنی آدم دے سارے گُناہ تے کُفر جنے اُہ بکن گے۔ معاف کیتے جانگے۔
۲۹۔ پر اُہ جہڑا پاک روح دے حق وچ کفر بولے۔ اُہنوں کدی بھی معافی نہیں ملدی۔ سگوں ہمیشہ دے گناہ وچ پھسیا ہویا ہے۔
۳۰۔ کیوں جو اُہناں آکھیا سی پئی پلیت روح اُہدے وچ ہے۔
۳۱۔ تے اُہدی ماں تے اُہدے بھرا آئے تے باہر کھلو کے اوس نُوں سدیا۔
۳۲۔ تے بھیڑاُہدے چوپھیرے بیٹھی ہوئی سی۔ تے لوک اُہنُوں آکھن لگے پئی ویکھ۔ تیری ماں تے تیرے بھرا باہر تینُوں ملنا چاہندے نے۔
۳۳۔ اوس اُہناں نُوں جواب دے کے آکھیا۔ کون ہے میری ماں تے کون میرے بھرا ؟
۳۴۔ تے اُہناں ول جِہڑے اُہدے آلے دوالے بیٹھے ہوئے سان نگاہ کر کے اوس آکھیا ویکھو میری ماں تے میرے بھرا۔
۳۵۔ کیوں جو جہڑاکوئی خدا دی مرضی اتے چلے سوئی میرا بھرا تے بھن تے ماں ہے۔

۱۔ تے اُہ پھیر سمندر دے کنڈھے تعلیم دین لگا تے ایڈی وڈی بھیڑاُہدے کول اکھٹی ہوئی پئی اُہ سمندر وچ اک بیڑی اُتے چڑھ بیٹھا۔ تے ساری بھیڑ خشکی اُتے سمندر دے کنڈھے رہی۔
۲۔ تد اوس اہناں نُوں تمثیلاں وچ بہت ساریاں گلاں سکھایاں۔ تے اپنی تعلیم وچ اُہناں نُوں آکھیا۔
۳۔ سُنو!ویکھو !اک بیجن والا بیجن نُوں نکلیا۔
۴۔ تے اہدے بی پاندیاں ایوں ہویا پئی کجھ پہے ول کرپیا۔ تے پینچھی آکے اُہنوں چُگ گئے۔
۵۔ تے ہور کجھ پتھریلی زمین اُتےکریا۔ جتھے اُہنوں بہت مٹی نہ ملی تے بہتی مٹی نا ملن کر کے اُہ چھتی اُگ پیا۔
۶۔ پر جد سورج چڑھیا تاں اُہ جُھلس گیا تے جڑنہ ہون دے سبب سک گیا۔
۷۔ تےہور کجھ کنڈیاں وچ کریا۔ تے کنڈیا ں ودھ کے اُہنوں دبا لیا۔ تے اُہ ناپھلیا۔
۸۔ تے ہور کجھ چنگی زمین وچ کریا۔ تے ودھ کے پھلیا کجھ تریہہ گُنا کُجھ سٹھ گُنا کُجھ سو گُنا۔
۹۔ تداوس آکھیا جہدے سنن دے کن ہون سو سُنے۔
۱۰۔ تے حد اُہ ا کلا ہویا ےتاں جِہڑے اُہدے کول سان۔ اوہناں اوہناں بارہاں نُوں سمیت اہدے کولوں تمثیلاں دا مطلب پچھیا۔
۱۱۔ تے اوس اُہناں نُوں آکھیا۔ خدادی بادشاہی دا بھید تہانُوں دِتّا گیا ہے پر اُہناں دے لئی جِہڑے باہر نے ساریاں گلاں تمثیلاں وچ ہندیاں نے۔
۱۲۔ پئی اہ ویکھن نُوں تے ویکھن پر اُہناں نُوں سمجھے نا۔ تے سُنن نُوں تے سُنن پر اہ بجھن نا۔ تاں اجیہا نہ ہووے پئی اُہ کدی مُڑآون تے اہناں نُوں معافی ملے۔
۱۳۔ تے اوس اُہناں نُوں آکھیا۔ تُسِیں اِہ تمثیل نہیں سمجھ دے تاں ساریاں تمثیلاں نُوں کیکر سمجھوگے ؟
۱۴۔ بیجن والا کلام بیجدا ہے۔
۱۵۔ تے پہے دے کنڈھے والے جتھے کلام بجیا جاندا ہے سواُہ لوک نے۔ پئی جد اہناں نے سن لیا۔ تد شیطان اونویں آکے اوس کلام نُوں لے جاندا ہے جہڑا اُہناں وچ بجیا گیا سی۔
۱۶۔ تے ایسے طرح جِہڑے پتھریلیاں تھانواں وچ بیجے جاندے نے سواہ نے۔ جِہڑے کلام نُوں سندیاں سار خوشی نال من لیندے نے۔
۱۷۔ تے اپنے وچ جڑ نہیں رکھ دے۔ پر تھوڑا چر رہندے نے ۔تے جد کلام دے لئی تکلیف پاندے یا ستائے جاندے نے۔ تاں جھٹ ٹھوکر کھاندے نے۔
۱۸۔ اِہ لوک نے جنہاں کلام سنا۔
۱۹۔ تے دنیا دے فکر۔ تے دولت دا دھوکا۔ تے ہورناں چیزاں دا لالچ آکے کلام نُوں دبا لیندے نے۔ اُہ ا پھل ہو جاندا ہے۔
۲۰۔ تے جِہڑے چنگی زمین وچ بیجے گئے سان۔ سو اُہ لوک نے جِہڑے کلام نُوں سُندے۔ تے قبول دے۔ تے پھل لیا وندے نے۔ کُجھ تریہہ گُنا۔ سٹھ گنا۔ کجھ سو گنا۔
۲۱۔ تے اوس اُہناں نُوں آکھیا۔ دیوے نُوں ٹوپے دے ہیٹھ یا منجی دے ہیٹھ رکھن لئی لیاوندے نے؟ تے ڈیوڑی اتے رکھن واسطے نہیں ؟
۲۲کیوں جو کوئی چیز چھپی نہیں جہڑی سامنے نا آوے۔ تے نا لُکائی گئی۔ پر ایس لئی پئی ظاہر ہووے۔
۲۳۔ جے کسے دے سُنن دے کن ہون تاں سُنے۔
۲۴۔ تے اوس اُہناں نُوں آکھیا۔ خبردار رہو پئی تُسِیں کیہ سُندے ہو۔ جس ناپ نال تُسِیں مندے ہو اوسے ناپ نال تُہاڈے لئی منیا جائے گا۔ تے تُہانُوں ودھیک دِتا جائے گا۔
۲۴۔ ایس لئی پئی جد ھے کول ہے اُہنوں دِتا جائےگا۔ تے جہدے کول نہیں ہے اُہدے تھوں جو کُجھ ہے سو بھی لے لیا جائے گا۔
۲۶۔ تے اوس آکھیا خدا دِی بادشاہی ایس طرح ہے۔ جہا کوئی جناں زمین اُتے بی پاوے۔
۲۷تے رات سویں تے دن جاگے۔ تے بی اُگ پوے تے ودھے۔ پر اُہ نہیں جاندا پئی کس طرح۔
۲۸۔ زمین تے آپے آپ پھل لے آؤندی ہے۔ پہلاں انگوری پھیر سٹا پھیرسٹے وچ ثابت دانہ۔
۲۹۔ تے جد پھل پک گیا تد اُہ اونویں داتری لاندا ہے پئی واڈھی دا ویلا آگیا ہے۔
۳۰۔ تے اوس آکھیا۔ ایس خدا دی بادشاہی نُوں کہدے دانگ دسے۔ یا اہدے لئی کہڑی تمثیل لیاویئے ؟
۳۱۔ اُہ رائی دے دانے وانگوں ہے۔ پئی جد زمین وچ بیجیا جاندا ہے۔ بھانویں زمین دے ساریاں بیاں نالوں نِکاہے۔
۳۲۔ پر جد بیجیا گیا تد اُگ د اہے تے ساریاں سبزیاں نالوں وڈا ہو جاندا ہے تے وڈیاں ٹہیاں کڈھ دا ہے۔ ایتھوں توڑی پئی اَسمان دے پنچھی اُہدی چھانویں دیسراسکدے نے۔
۳۳۔ تے اِہو جہیاں بہتیریاں تمثیلاں وچ اُہناں دے سنن دی طاقت موجب اُہ اُہناں نُوں کلام سناندا سی۔
۳۴۔ تے تمثیل بنا اُہ اہناں نال نہیں سی بولدا۔ تے اِکلاہو کے اپنے شاگرداں نُوں ساریاں گلاں کھول کے دسدا سی۔
۳۵۔ تے اوسے دن جد شام ہوئی اوس اُہناں نُوں آکھیا پئی اسیں پار چلئے۔
۳۶۔ تے بھیڑ نُوں چھڈ کے اُہ اُہنوں جس طر ح ہے سی بیڑی اُتے نال لے گئے۔ تے ہوربھی بیڑیاں اُہدے نال سان۔
۳۷۔ تد بڑی ہنیری وگی۔ تے ٹھلاں بیڑی اُتے ایتھوں تیکر لگیاں۔ پئی بیڑی پانی نال بھر چلی سی۔
۳۸۔ تے اُہ بیڑی دے پچھلے سرے ول سر ہانا رکھ کے ستا پیا سی۔ تد اُہناں اُہنوں جگایا تے اُہنوں آکھیا۔ اے اُستاد تینُوں فکر نہیں پئی اسیں مر چلے ہاں؟
۳۹۔ تد اوس اُٹھ کے ہوا نُوں دبکایا تے سمندر نُوں آکھیا چپ کر تھم جا۔ تد ہوا تھم گئی تے بڑا آرام ہویا۔
۴۰۔ پھیر اُہناں نُوں آکھیا تُسِیں کاہنُوں ڈردے ہو۔ تہانُوں اجے ایمان نہیں ؟
۴۱۔ تے اہناں نے ڈاڈھا بھوکھا دا تے آپو وچ آکھن لگے پئی اہ کون ہے۔ پئی اہدی ہوا تے سمندر بھی مندے نے۔

۱۔ تے اُہ سمندر دے پار گراسینیاں دے دیس وچ اپڑ ے۔
۲۔ تے جاں اُہ بیڑی اتُوں اُتریا۔ تاں اونویں اک جنا جنہوں پلیت روح چمبڑی ہوئی سی قبراںوچوں نکل کے اہنُوں آملیا۔
۳۔ اُہ قبراں وچ وسدا سی۔ تے ہن کوئی اہُنُوں سنگلاں نال بھی جکڑنہیں سی سکدا۔
۴۔ کیوں جو اُہ کئی واری بیڑیاں تے سنگلاں نال جکڑیا گیا سی۔ تے اوس سنگلاں نُوں توڑ سٹیا۔ تے بیڑیاں نُوں ٹوٹے ٹوٹے کر دِتّا تے کوئی اُہنوں قابو نہیں سی کر سکدا۔
۵۔ تے اُہ ہمیشہ دِن رات قبراں تے پہاڑاں وچ چیکاں ماردا تے اپنے آپ نُوں پتھراں نال وڈھدا ہندا سی۔
۶۔ پر جیوں اوس یِسُوع نُوں دوروں ڈٹھا تیوں دوڑیا۔ تے اہنُوں سجدہ کیتا۔
۷۔ تے بڑی آواز نال پکار کے آکھیا تیرا میرے نال کیہ واسطہ؟یِسُوع خدا تعالیٰ دے بیٹے۔ تینُوں خدا دی سونہہ دینا ہاں۔ مینُوں دکھ نہ دے۔
۸۔ کیوں جو اوس اُہنوں آکھیا سی۔ اے پلیت روح ایس آدمی وچوں نکل جا۔
۹۔ پھیر اوس اُہنوں پُچھیا پئی تیرا کیہ ناں ہے ؟اوس اہنُوں آکھیا۔ میرا ناں لشکر ہے۔ کیوں جو ایس بہت سارے ہاں۔
۱۰۔ تے اوس اُہدیاں بہت منتاں کیتیاں پئی سانُوں ایس دیس وچوں نہ کڈھ۔
۱۱۔ تے اوتھے پہاڑاں دے نیڑے سوراں دا اک بڑا اجڑ چُکدا سی۔
۱۲۔ تے اُہناں اُہدی منت کر کے آکھیا۔ پئی سانُوں سوراں دے وچ گھل دے پئی اسیں اُہناں دے وچ جا وڑیئے۔
۱۳۔ تے اوس اہناں نُوں جان دتا۔ تے پلیت روحاں نکل کے سوراں وچ وڑگیاں۔ تے اِجڑڈھائے اُتُوں سر توڑ بھج کے سمندر وچ جا ڈگیا۔ اُہ گنیتری وچ دو ہزار سان۔ تے اُہ سمندر وچ ڈب موئے۔
۱۴۔ تے اُہناں دے چارن والیاں نس کے شہر تے پنڈاں وچ خبر پہچائی۔ تے لوک ویکھن آئے۔ پئی کیہ کیہ ہویا۔
۱۵۔ تے یِسُوع دے کول آکے اوس دیوا نے نُوں جہندے وچ بد روحاں دا لشکر سی۔ بیٹھیاں ہویاں تے کپڑ ےپایاں ہویاں۔ تےسرت سمبھالیاں ہویاں ویکھیا۔ تے ڈر گئے۔
۱۶۔ تے جہناں اِہ ویکھیا سی اوس دیوانے دا حال تے سوراں دا حال دیسا۔
۱۷۔ تد اُہ اُہدی منت کرن لگے پئی ساڈی حدوں باہر چلیا جا۔
۱۸۔ تے جیوں اُہ بیٹری اُتے چڑھن لگا تِیوں اوس جنہُوں پہلاں بدروحاں چمبڑیاں ہویاں سان۔ اہدے نال رہن واسطے اہدے اَگے عرض کیتی۔
۱۹۔ تے اوس اُہنوں اِجازت نا دِتّی پر اُہنوں آکھیا۔ پئی اپنے گھر اپنے ساکاں کول جا۔ تے اُہناں نُوں دس۔ پئی خداوند نے تیرے لئی کیڈے وڈے کم کیتے نے۔ تے تیرے اتےس دَیا کیتی۔
۲۰۔ تے اُہ ٹُر پیا تے دِکاپولُس دے دیس وچ منادی کرنی شروع کیتی۔ پئی یِسُوع اُہدے لئی کیڈے کم کیتے۔ تے سارے لوک حیران ہوئے۔
۲۱۔ تے جاں یِسُوع بیڑی اُتے پھیر پار لنگھیا۔ تے۔ تاں بڑی بھیڑ اُہدے کول اکٹھی ہوئی۔ تےاُہ سمندر دے کنڈھے اُتے سی۔
۲۲۔ تےعبادت خانے دے سرداراں وچوں یائرس ناں اک بندہ آیا تے اُہنوں ویکھ کے اُہدے پیریں پیا۔
۲۳۔ تے اُہدی بہت منت کیتی۔ پئی میری چھوٹی دھی پئی مردی ہے چل کے اُہدے اُتے ہتھ رکھ پئی اُہ چنگی ہووے تے جیوندی رہے۔
۲۴۔ تد اُہ اُہدے نال گیا۔ تے بڑی بھیڑ اُہدے مگر ٹر پئی تے اُہدے اُتے ڈگدی پئی سی۔
۲۵۔ تے اک زنانی جہنُوں بارہاں ورھیاں تھوں لہو آوندا سی۔
۲۶۔ تے اوس بہت حکیماں دے ہتھوں بڑا دکھ پایا۔ تے اپنا سارا مال خرچ کر دتا سی۔ پر کجھ بھی آرام نہ پایا۔ سگوں اُہدا ماڑا حال ہو گیا سی۔
۲۷۔ اُہ یِسُوع دی خبر سُن کے بھیڑ وچ اُہدے پچھوں دی ہو کے آئی۔ تے اُہدا کپڑا چُھویا۔
۲۸۔ کیوں جو اُہ آکھدی سی پئی جے میں اوہدا کپڑا ئی چھو لواں تاں چنگی ہو جاں گی۔
۲۹۔ تے اونویں ئی اُہدے لہُو دی سِیر سُگ گی تے اوس اپنے بدن تھوں معلوم کرلیا۔ پئی میں ایس بلا تھوں چُھٹی۔
۳۰۔ تد یِسُوع نے اوسے ویلے اپنے وچ جان کے پئی میرے وچوں قوت نکلی بھیڑ ول مُڑ کے آکھیا۔ میرے کپڑیاں نُوں کِس چُھویا ؟
۳۱۔ تے اُہدے شاگرداں اہنُوں آکھیا۔ تُوں ویکھنایئں۔ پئی بھیڑ تینُوں پئی دباندی ہے پھیر تُوں آکھنا ہی پئی مینُوں کس چُھویا؟
۳۲۔ تد اوس چو پھیرے نظر ماری پئی ایس کم دے کرن والی نُوں ویکھے۔
۳۳۔ پر اُہ زنانی جاں اُہنوں معلوم ہویا پئی میرے اُتے کیہ گزریا ہے تاں ڈردی تے کنبدی آئی تے اُہدے اَگے ڈگ پئی۔ تے ساری حقیقت اُہنوں دس دتی۔
۳۴۔ تے اوس آکھیا۔ پتر تیرے ایمان نے تینُوں ول کیتا ہے سلامت ٹر جا تے اپنی بلا تھوں بچی رہو۔
۳۵۔ اُہ اجے بولدا ئی سی پئی عبادت خانے دے سردار دے گھروں لوکاں آکے آکھیا۔ تیری دھی مرگئی۔ ہن تُوں استاد نُوں کیوں ہور اوکھیاں کرنا ئیں؟
۳۶۔ پر یِسُوع اوس گل دی جو آکھدے سان پرواہ نہ کر کے عبادت خانے دےسردار نُوں آکھیا۔ نا ڈر صرف ایمان رکھ۔
۳۷۔ تے اوس بناں پطرس۔ تے یعقوب۔ تے یعقوب دے بھرا یوحنا دے ہور کسے نُوں اپنے نال نہ آون دِتا۔
۳۸۔ جد ا ُہ عبادت خانے دے سردار دے گھر پہنچے تد اوس رولا پیا ہویا تے لوکاں نُوں بہت روندے کر لاندے ویکھیا۔
۳۹۔ تے اندر جاکے اُہناں نُوں آکھیا پئی تُسِیں کاہدے لئی رولا پاندے ہو؟لڑکی تاں موئی نہیں پر ستی ہوئی ہے۔
۴۰۔ تے اُہ اُہدے اُتے سہے پراُہ سنبھناں نُوں باہر کڈھ کے لڑکی دے پیو تے اہدی ماں تے اپنے ساتھیاں نُوں نال لے کے جتھے لڑکی سی اوتھے اندر گیا۔
۴۱۔ تے اوس لڑکی دا ہتھ پھڑ کے اہنُوں آکھیا تلیتھاقومی۔ جہدے معنے اِہ نے۔ کُڑئیے میں تینُوں آکھنا ہاں اُٹھ۔
۴۲۔ تے جھٹ کُڑی اُٹھ کھلوتی۔ تے ٹرن پھرن لگ پئی۔ کیوں جو اہ بارہاں ورہیاں دی سی۔ تد اونویں بڑے ئی حیران ہوئے۔
۴۳۔ تے اوس اُہناں نُوں بڑی تاکید کیتی پئی اِہ گل کوئی نہ جانے۔ تے آکھیا۔ اُہنوں کجھ کھان نُوں دیو۔

۱۔ تےاُہ اوتھوں ٹر پیا۔ تے اپنے دیس وچ آیا۔ تے اُہدے شاگرد اُہدے مگر لگ پئے۔
۲۔ تے جد سبت دا دن ہویا تد اُہ عبادت خانے وچ تعلیم دین لگا تے بہت سُنن والیاں حیران ہوکے آکھیا پئی اِہ گلاں اُہنوں کتھوں آیاں ؟تے اِہ کہی دانائی ہے جو اُہنوں دِتّی گئی ؟ تے اہو جیہیاں کراماتاں جہڑیاں اُہدے ہتھوں ہندیاں نے کیہ نے ؟
۳۔ اِہ تر کھان نہیں ہے مریم دا پتر۔ تے یعقوب تے یوسیس تے یہودا تے شمعون دا بھرا تے اوہدیاں بھیناں ایتھے ساڈے کول نہیں نے ؟ تے اُہناں اُہدے تُوں ٹھوکر کھا دی۔
۴۔ تے یِسُوع اُہناں نُوں آکھیا نبی کتِے بے قدر نہیں ہے سوااپنے دیس دے۔ تے اپنے انگاں ساکاں تے اپنے گھر دے۔
۵۔ تے کوئی کرامات اوس تھاں نہ وکھال سکیا بناں ایس دے پئی تھوڑے جہے روگیاں اُتے ہتھ رکھ کے اُہناننُوں ول کِیتا۔
۶۔ تے اوس اُہناں دی بے ایمانی اُتے تعجب کیتا۔ تے آلے دوالے دے پنڈاں وچ اُہ تعلیم دیندا پھریا۔
۷۔ تے اوس بارہاں نُوں کول سدیا تے اہناں نُوں دو دو کر کے گھلنا شروع کیتا۔ تے اہناں نُوں پلیت روحاں اُتےاخیتار دِتا۔
۸۔ تے اُہناں نُوں حکم کیتا پئی راہ دے لئی سوٹی دے بناں ہور کجھ نہ لئو۔ نا تھیلی نا روٹی نا لک نال پیسے بنھو۔
۹۔ پر جُتی پاؤ تے دو کڑتےنہ پہنو۔
۱۰۔ تے اوس اُہناں نُوں آکھیا پئی جِتھے تُسِیں کسے گھر وچ جاؤ۔ اوتھے ئی ٹکو۔ جناں چر اوتھوں نہ ٹُرپو۔
۱۱۔ تے جتھے کتھےتُہانُوں رہن نا دین۔ تے لوک تہاڈی نا سُنن تاں اوتھوں نکلدیاں اپنے پیراں دا گھٹا جھاڑ سُٹو۔ پئی اُہناں اُتے گواہی ہووے۔
۱۲۔ تے باہر جا کے اُہناں منادی کیتی پئی لوک توبہ کرن۔
۱۳۔ تے اُہناں بہتیاں بد رُوحاں نُوں کڈھ دِتا۔ تے بہتیاں روگیاں نُوں تیل مل کے وَل کیِتا۔
۱۴۔ تے ہیرو دیس بادشاہ نُوں خبر پہنچی۔ اُہدا ناں جو مشہور ہو گیا سی۔ تے اوس آکھیا۔ پئی یوحنا بپتسمہ دین والا مردیاں وچوں جی اُٹھیا ہے۔ ایس لئی کراماتاں اُہدے ہتھوں ہندیاں نے۔
۱۵۔ دوجے آکھدے سان اِہ الیاس ہے۔ تے دُوجے پئی۔ اک نبی ہے ہورناں نبیاں وانگوں۔
۱۶۔ پر ہیرودیس نے سن کے آکھیا۔ اِہ یوحنا ہے۔ جہدا میں سر وڈھوایا سی۔ اُہو جی اُٹھیا ہے۔
۱۷۔ کیوں جو ہیرودیس اپنے بھرا فلپس دی وہٹی ہیرودیاس دے سبب جہنوں اوس ویاہ لیا سی۔ آپے گھل کے یوحنا نُوں پھڑوایا۔ تےقید خانے وچ اُہنوں بند کیتا سی۔
۱۸۔ ایس لئی پئی یوحنا نے ہیرودیس نُوں آکھیا سی پئی اپنے بھرا دی وہٹی نُوں رکھنا تنیوں روا نہیں۔
۱۹۔ تے ہیرودیاس اُہدے نال ویر رکھ د ی تے اُہنوں جانوں مارنا چاہندی سی۔ پر وس نہیں سی چلدا ۔
۲۰۔ کیوں جو ہیرودیس یوحنا نُوں نیک تے دھرمی آدمی جان کے اُہدے تھوں ڈردا تے اُہنوں بچائی رکھدا سی۔ تے اُہدی سُن کے بڑا حیران ہُندا سی۔ تے خوشی نال اُہدی سندا ہندا سی۔
۲۱۔ تے موقعہ دا دہاڑا آگیا۔ پئی ہیرودیس اپنے جنم دن اُتے بڑے بڑے امیراں تے صوبیداراں تے گلیل دے رئیساں دی ضیافت کیتی۔
۲۲تے جاں ہیرو دیاس تے اہدے نال بہین والیاں نُوں خوش کیتا۔ تاں بادشاہ نے کُڑی نُوں آکھیا۔ جو چاہیں تُوں میتھوں منگ میں تینوں دیا نگا۔
۲۳۔ تے اُہدے نال سونہہ کھادی پئی جو کجھ میتُھوں منگیں گی۔ میں اپنے اَدھے راج تیکر بھی تینُوں دے دیاں گا۔
۲۴۔ تے اوس باہر جاکے اپنی ماں نُوں آکھیا۔ پئی میں کِیہ منگا ں ؟ اُہ آکھن لگی۔ یوحنا بپتسمہ دین والے دا سر۔
۲۵۔ تد اُہ اوسے ویلے بادشاہ دے کول چھیتی نال اندر گئی تے عرض کیتی پیئی میں چاہنی ہاں۔ تُوں یوحنا بپتسمہ دین والے دا سر مینُوں ہنے تھال وچ دیدے۔
۲۶۔ تے بادشاہ بہت اداس ہویا۔ پر اُہ اپنی سونہہ تے مجلس دی خاطر اُہدے تھوں نہ نہیں سی کرنا چاہندا۔
۲۷۔ تد بادشاہ اوسے ویلے سپاہی نُوں حکم دے کے گھلیا پئی اُہدا سر لیا وے تے اوس جا کے اُہدا سر قید خانے وچ وڈھیا۔
۲۸۔ تے اِک تھال وچ رکھ کے لیاندا۔ تے کُڑی نُوں دِتا تے کُڑی نے اُہ اپنی ماں نُوں دِتا۔
۲۹۔ تے اُہدے شاگرد سن کے آئے تے اہدی لوتھ چک کے اُہناں قبر وچ رکھی۔
۳۰۔ پھیر رسول یِسُوع دے کول ا کٹھے ہوئے جو کجھ اُہنا ں کیتا تے جو کجھ تعلیم دِتی سی سب کجھ اُہنُوں دیسا۔
۳۱۔ تد اوس اُہناں نُوں آکھیا۔ تُسِیں آپ الگ ہو کے اجاڑ تھاں ٹر چلو۔ تے ذرا آرام کرو۔ ایس لئی پئی آون جان والے بہت سان۔ تے روٹی کھان دی وی وہل نہیں سی ہندی۔
۳۲۔ تد اوہ بیڑی اُتے چڑھ کے اک اُجاڑ تھاں وچ الگ چلے گئے۔
۳۳۔ پر لوکاں اُہنوں جاندیاں ویکھیا۔ تے بہتیریاں اُہنو ں پچھانیا تے سارے شہراں تھو ں پیدل اُدھر نُوں اکٹھے دوڑے تے اُہناں تھوں اَگے اپڑے۔
۳۴۔ تے یِسُوع بڑی خلقت ویکھی۔ تے اُہنوں اُہدے اُتے ترس آیا۔ کیوں جو اُہ اُہناں بھیڈاں وانگوں سان۔ جہناں دا ایالی نہ ہووے۔ تے اوس اُہناں نُوں بہیتریاں گلاں سکھانیاں شروع کیتیاں۔
۳۵۔ تے جد دن بہت ڈھل گیا۔ اُہدے شاگرداں نے اُہدے کول آکے آکھیا۔ اِہ تھاں اُجاڑہے۔ تے ہن کویلا ہوگیا ہے۔
۳۶۔ اِہناں نُوں ودیا کر۔ پئی اُہ آلے دوالے دے پنڈاں تے گرانواں وچ جاکے اپنے لئی کُجھ کھان نُوں مُل لَین۔
۳۷۔ اوس اُہناں نُوں جواب دے کے آکھیا۔ تُسِیں آپے اِہناں نوں کھان نُوں دیو۔ تد اُہناں اُہنوں آکھیا۔ اسیں دو سو دیناراں دیاں روٹیاں جاکے مُل لیا لئے تے اُہناں نُوں کھوالے ؟
۳۸۔ اوس اُہناں نُوں آکھیا۔ تُہاڈے کول کنیاں روٹیاں نے۔ جا کے ویکھو؟تے اُہناں معلوم کر کے آکھیا۔ پنج روٹیاں تے دو مچھیا ں نے۔
۳۹۔ تد او س اُہناں نُوں حکم دِتا۔ پئی اُہ سبھے ہر ے گھاہ اُتے جُنڈیاں ہو کے بہہ جان۔
۴۰۔ تے اُہ سو سو تے پنجا ہ پنجاہ ہو کے پالو پال ہو بیٹھے۔
۴۱۔ تد اوس اُہناں پنجاں روٹیاں تے دوں مچھیاں نُوں لیا۔ تے آسمان ول ویکھیا۔ تے برکت منگ کے روٹیاں توڑیا ں تے لوکاں دے اَگے رکھن لئی شاگرداں نُوں دیتاں۔ تے دو مچھیاں اوس اُہناں سبھناں نُوں ونڈیاں۔
۴۲۔ تے سارے کھا کے رَج گئے۔
۴۳۔ تے اُہناں ٹکڑیاں نال باراں ٹوکریاں بھریاں ہویاں اُٹھائیاں۔ تے کُجھ مچھیاں وچوں بھی چکیاں۔
۴۴۔ تے روٹیاں دے کھان والے پنج ہزار آدمی سان۔
۴۵۔ تے اونویں اوس اپنے شاگرداں نُوں پکی کیتی۔ پئی جد تیکر میں بھیڑ نُوں ودیا نہ کراں۔ تُسِیں بیڑی اُتے چڑھ کے میرے اَگے بیت صید انُوں پار جاؤ۔
۴۶۔ تےجد اوس اُہناننُوں ٹور دتا۔ اُہ پہاڑ اُتے دعا منگن نُوں گیا۔
۴۷۔ تے جد ترکالاں پیا ں تاں بیڑی سمندر دے وچگھار سی۔ تے اُہ اکلا خشکی اُتے سی۔
۴۸۔ تے جداوس اُہناں نُوں چپے لان وچ اوکھیاں ڈٹھا (کیوں جو ہوا سامنی سی) تد پچھلے پہر رات نُوں سمندر اُتےٹردیاں اُہناں ول آیا۔ تے اُہناں تھوں اَگے ودھن لگا۔
۴۹۔ پر اُہناں اُہنوں سمندر اُتے ٹر دیاں ویکھ کے بھُوتنا جانیا۔ تے ڈڈیا اُٹھے۔
۵۰۔ کیوں جو ساریاں اُہنوں ویکھیا۔ تے گھبر ا گئے۔ پر اوس اونویں اُہناں نال کیتی۔ تے اُہنا ں نُوں آکھیا۔ خاطر جمع رکھو میں ہاں نا ڈرو۔
۵۱۔ پھیر اُہ اُہناں نال بیڑی اُتے چڑھ گیا۔ تے ہوا کھلو گئی۔ تد اُہ اپنے دلاں وچ ڈاڈھے حیران ہوئے۔
۵۲۔ ایس لئی پئی اُہناں نے اُہناں روٹیاں دی گل نہیں سی سمجھی پر اُہناں دے دل سُن ہوئے ہوئے سان۔
۵۳۔ تے اُہ پار لنگھ کے گنیسرت دت دیس وچ اپڑے تے بیڑی نُوں کنڈھے اُتّے لایا۔
۵۴۔ تے جاں اُہ بیڑیوں لتھے تاں لوکاں اُہنوں جھٹ سیان لیا۔
۵۵۔ تے اوس سارے دیس وچ دوڑ بھج کر کے بیماراں نُوں منجیاں اُتے پاکے جتھے جتھے اُہناں سنیاں پئی اُہ ہُندا سی اوتھے اوتھے ئی لئی پِھرے۔
۵۶۔ تےجتھے کتے اہ گرانواں یاشہراں یا پنڈاں نُوں جاندا سی اوتھے لوک ماندیاں نُوں بازاراں وچ لیا پاندے۔ تے اہدیاں منتاں کردے سان۔ پئی اُہدے کپڑے دے پلے نُوں ئی چھونا ملے۔ تے جنیاں اُہنوں چھویا سو ول ہو گئے۔

۱۔ پھیر فریسی تے کئی فقیہ اُہدے کول جمع ہوئے۔ اُہ یروشلیم تھوں آئے سان۔
۲۔ تے اُہناں اُہدے کیاں شاگرداں نُوں ویکھیا پئی اُہ میلے یعنے اَن دھوتے ہتھاں نال روٹی کھاندے نے۔
۳۔ کیوں جو فریسی تے سارے یہودی وڈیاں دی ریت نُوں من کے جد تیکر ہتھاں نُوں مَل مَل کے نا دھو لین کھاندے نہیں۔
۴۔ تے بازاروں آکے نہیں کھاندے جناں چر نہا نہ لین۔ تے ہور بہتیریاں گلاں نے جہڑیاں اُہناں منن لئی قبول کیتیاں نے۔ جہا کٹوریاں تے لوٹیاں تے پتل دے بھانڈیاں دا دھونا۔
۵۔ تےفریسیاں تے فقیہاں اُہنوں پچھیا۔ پئی تیرے شاگرد وڈیاں دی ریت اُتے کیوں نہیں ٹردے سگوں میلیں ہتھیں روٹی کھاندے نے۔
۶۔ اوس اُہناں نُوں آکھیا۔ یشعیاہ نے تُساں رکاراں دی بابت خوب نبوت کیتی۔ جہا لکھیا ہے پئی اہ لوک موہنُوں میری آدر کر دے نے۔ پر اہناں دا دل متیھوں دور ہے۔
۷۔ تےاہ بے فاید ہ میری عبادت کردے نے۔ اہ بندیاں دے حکماندی تعلیم دیندے نے۔
۸۔ تُسِیں خدادے حکم نُوں چھڈ کے بندیاں نُوں دی ریت نُوں پھڑ لیندے ہو۔
۹۔ تے اوس اہناں نُوں آکھیا۔ تُسِیں اپنی ریت نُوں قائم رکھن واسطے خدا دے حکم دی چنگی طرح بے قدری کردے ہو۔
۱۰۔ کیوں جو موسیٰ نے آکھیا۔ پئی اپنے پیو تے اپنی ماں دی آدر کر۔ تے جہڑا پیو یا ماں نُوں مندا بولے اہ جانُوں ماریا جائے۔
۱۱۔ پر تُسِیں آکھدے ہو پئی جیکر آدمی پیو یا ماں نُوں آکھے۔ پر جہڑا حق میرے کولوں تینُوں آسکدا سی سو قربان یعنی چڑھاوا ہو گیا۔
۱۲۔ تُسِیں پھیر اُہنوں اُہدے پیو یا اہدی ماں دے لئی کجھ کرن نہیں دیندے ہو۔
۱۳۔ ایسے طرح تُسِیں خدا دے کلام نُوں ریت نال جہنُوں تُساں جاری کیتا ہے جھوٹھیاں کردے ہو۔ تے ہور بہتیرے اہو جہے کم تُسِیں کردے ہو۔
۱۴۔ تے اوس لوکاں نُوں پھیر کول سد کے آکھیا۔ تُسِیں سارے میری سنو تے سمجھو۔
۱۵۔ اجہی کوئی چیز آدمی دے باہر نہیں ہے جہڑی اُہدے اندر جاکے اُہنوں پلیت کر سکے۔
۱۶۔ پر جہڑیاں چیزاں اُہدے اندروں نکلدیاں نے سوئی آدمی نُوں پلیت کردیاں نے۔
۱۷۔ جد اُہ بھیڑ دے کولوں گھر وچ گیا۔ اُہدے شاگرداں اُہنوں اُہ تمثیل پچھی۔
۱۸۔ تے اوس اہناں نُوں آکھیا۔ تُسِیں بھی اجہے بے سمجھ ہو تُسِیں نہیں سمجھدے پئی جو کجھ باہروں آدمی دے اندر جاندا ہے ۔ اُہنُوں پلیت نہیں کر سکدا۔
۱۹۔ کیوں جو اُہ اُہدے من وچ نہیں پہنچدا۔ پر ڈھڈھ وچ جاندا ہے۔ تے رُوڑی اُتے سُٹیا جاندا ہے ؟ اِہ آکھ کے اوس ساری خوراک نُوں پاک ٹھیرایا۔
۲۰۔ پھیر اوس آکھیا۔ پئی جو آدمی دے اندروں نکلدا ہےاوہو آدمی نُوں پلیت کردا ہے۔
۲۱۔ کیوں جو اندروں یعنے بندیاں دے منُوں ئی بُرے خیال نکلدے نے۔ حرامکاریاں چوریاں۔
۲۲۔ خُون۔ زناکاریاں۔ لالچ۔ شرارتاں۔ فریب۔ مستی۔ بُری نظر۔ کُفر۔ شیخی۔ بے عقلی۔
۲۳۔ اِہ ساریاں بُریاں چیزاں اندروں نکلدیاں تے بندے نُوں پلیت کردیاں نے۔
۲۴۔ تے اوتھوں اُٹھ کے صورتے صیدا دیاں حدّاں وچ گیا۔ تے اک گھر وچ جا کے چاہندا سی پئی کسے نُوں خبر نہ ہووے۔ پر اُہ چُھپ نہ سکیا۔
۲۵۔ کیوں جو اک زنانی جہدی نِکی دِھی نُوں اک پلیت روح چمبڑی ہوئی سی۔ اونویں اُہدی خبر سن کے آئی۔ تے اُہدے پیریں پئی۔
۲۶۔ اُہ زنانی یُونانی تے جنم دی سوروفینیکی سی۔ اوس اُہدے اَگے عرض کیتی پئی اوہ اُہدی دِھی وچوں بدرُوح نُوں کڈھے۔
۲۷۔ پر اوس اُہنوں آکھیا۔ پہلاں بچیاں نُوں رجّن دے۔ کیوں جو بچیاں دی روٹی لے کےکُتوریاں اَگے سُٹنی نہیں چاہیدی۔
۲۸۔ اوس اُہنُوں آکھیا۔ ہاں خداوند پر کتورے بھی تاں میز دے ہٹیھوں بچیاں دا رہیا کھیاکھاندے نے۔
۲۹۔ تد اوس اہنُوں آکھیا ایس گل پچھے ٹر جا۔ تیری دھی وچوں بد روح نکل گئی ہے۔
۳۰۔ تے گھر جا کے اوس کُڑی نُوں منجی اُتے لمی پئی ہوئی ویکھیا تے بد روح نکلی ہوئی ہے۔
۳۱۔ تے پھیر اہ صوردیاں حداں دے وچوں دی ہو کے گلیل دے سمندر نُوں آیا۔
۳۲۔ تے لوکاں اک بولے نُوں جہدی جیبھ تھتھلاندی سی۔ اوہدے کول لیا کے اُہدی منت کیتی پئی اُہ اُہدے اُتے ہتھ رکھے۔
۳۳۔ تے اُہ اُہنوں بھیڑ تھوں الگ لے کے اپنیاں اُنگلیاں اُہدے کناں وچ دِیتاں۔ تے تھک کے اُہدی جیبھ نُوں چھویا۔
۳۴۔ تے اَسمان ول ویکھ کے ہوکا بھریا۔ تے اہنُوں آکھیا۔ اِفتاح یعنے کُھل جا۔
۳۵۔ تے اُہدے کن کُھل گئے تے اُہدی جیبھ دی گنڈھ کُھل گئی تےاُہ صاف بولن لگا۔
۳۶۔ تے اوس اُہناں نُوں تاکید کیتی پئی کسے نُوں ناں دسنا۔ پر جہنی اوس اُہناں نُوں تاکید کیتی اوناں ئی سگوں اُہ اوس گل نُوں ہور بھی بہت مشہور کردے رہے۔
۳۷۔ تے لوکاں بڑے حیران ہوکے آکھیا ایس سب کجھ چنگا کیتا ہے۔ پئی بولیاں نُوں سنن دی تے گونگیاں نُوں بولن دی طاقت دینداہے۔

۱۔ اُہنیں دِنیں جدوں پھیربڑی بھیڑ اکٹھی ہو گئی۔ تے اُہناں کول کھان نُوں کجھ نہیں سی۔ تاں اوس اپنے شاگرداں نُوں کول سد کے اُہناں نُوں آکھیا۔
۲۔ مینُوں لوکاں اُتے ترس آوندہے۔ کیوں جو ہُن ترے دن ہوئے نے پئی اُہ میرے نال رہے نے۔ تے اُہناں کول کجھ کھان نُوں نہیں ہے۔
۳۔ تے جے میں اُہناں نُوں بھکھیاں گھرنُوں ٹوراں۔ تاں واٹے ماندے پے جان گئے۔ تے اُہناں وچوں کئی دوروں آئے ہوئے نے۔
۴۔ تے اُہدے شاگرداں اُہنوں جواب دِتا پئی کتھوں ایسااُجاڑ وچ کوئی اِہناں نُوں روٹی نال رَجا سکیگا ؟
۵۔ تے اوس اُہناں تھوں پچھیاپئی تُہاڈے کول کِنیاں روٹیاں نے۔ اُہ آکھن لگے ست۔
۶۔ پھیر اوس لوکاں نُوں حکم کیتا پئی زمین تے بہہ جان۔ تے اوس اوہی ست روٹیاں لیاں تے شکر کر کے توڑیاں تے اپنےشاگرداں نُوں دیتاں۔ پئی اِہ اُہناں دے اگےرکھن تے اہناں نے لوکاندے اگے رکھ دِیتاں۔
۷۔ اُہناں دے کول تھوڑیاں جہیاں نِکیاں مچھیاں سان سواوس اُہناں اُتے برکت منگ کے آکھیا۔ پئی ایہہ بھی اُہناں دے اَگے رکھو۔
۸۔ سو اُہناں کھادا تے رَج گئے۔ تے بچیاں ہویاں ٹکڑیاں نال اُہناں ست ٹوکرے بھر ے ہوئے چک لئے۔
۹۔ تے اُہ چار ہزار آدمی سان۔ پھیراوس اُہناں نُوں ٹور دِتا۔
۱۰۔ تے اُہ اپنے شاگرداں دے نال اونویں بیڑی اُتے چڑھ کے دلمنوتہ دے دیس وچ آیا۔
۱۱۔ تے فریسی نکلے تے اُہدے ازمان لئی اَسمان ولوں اُہدے تھوں نشان منگ کے اُہدے نال جھگڑا کرن لگے۔
۱۲۔ تے اوس اپنے دلوں ہوکا بھر کے آکھیا۔ ایس زمانے دے لوک کیوں نشان منگدے نے۔ میں تہانُوں سچ آکھنا ہاں۔ پئی ایس زمانے دے لوکاں نُوں کوئی نشان دِتا نہ جائے گا۔
۱۳۔ تے اہناں نُوں چھڈکے پھیر بیڑی اُتے چڑھیا۔ تے پار ٹُر گیا۔
۱۴۔ تےاُہ روٹی لینی بھل گئے سان۔ تے بیڑی وچ بناں اک روٹی دے اہناں کول کجھ نہیں سی۔
۱۵۔ تے اوس اہناں نُوں آکھیا۔ خبردار۔ فریسیاں دے خمیر تھوں۔ تے ہیرودیس دے خمیر تھوں ہوشیار رہو۔
۱۶۔ تد اُہ آپو وچ چرچا کر کے آکھن لگے۔ ساڈے کول روٹی جو نہیں ہے۔
۱۷۔ یِسُوع اِہ جان کے اہناں نُوں آکھیا۔ تُسِیں کیوں چرچا کردے ہو۔ پئی ساڈے کول روٹی نہیں ؟
۱۸۔ تُسِیں اجے نہیں جاندے تے نا سمجھدے ہو۔ تہاڈا من سُن ہویا ہویا ہے ؟اکھیاں ہندیاں نہیں ویکھدے تے کن ہندیاں نہیں سندے تے تہانُوں یاد نہیں۔
۱۹۔ جد میں پنج روٹیاں پنج ہزار لئی توڑیاں تد تساں ٹکڑیاں دیاں کنیاں ٹوکریاں بھریاں ہویاں چکیاں ؟
۲۰۔ اہناں اہنوں آکھیا۔ باراں۔ تے جد ست روٹیاں چونہہ ہزارں لئی توڑیاں تد تساں ٹکڑیاں دے کنے ٹوکرے بھرے چکے؟اہناں آکھیا۔ ست۔
۲۱۔ تد اوس اُہناں نُوں آکھیا۔ اجے تہانُوں سمجھ نہیں آوندی۔
۲۲۔ پھر اُہ بیت صیدا وچ آئے ۔ تے لوک اک اَنّھے نُوں اُہدے کول لیائے۔ تے اُہدی مِنت کیتی۔ پئی اُہنوں چھوئے۔
۲۳۔ تے اُہ اَنّھے دا ہتھ پھڑ کے اُہنوں پنڈوں باہر لے گیا۔ تے اُہدیاں اکھیاں وچ تُھک کے اُہدے اُتے ہتھ رکھیا۔ تے اُہنوں پچھیا۔ پئی تینُوں کجھ دسدا ہے ؟
۲۴۔ تے اوس نظر کر کے آکھیا۔ میں بندیاں نُوں ویکھنا ہاں پئی اُہ بوٹیاں وانگوں ٹردے ہوئے مینُوں دسدے نے۔
۲۵۔ تد اوس پھیر اُہدیاں اَکھّیاں اُتے ہتھ رکھے تے اوس بنا کے ڈِٹھا۔ تے اُہ سُجاکھا ہوگیا۔ تے سب کجھ صاف صاف ویکھن لگا۔
۲۶۔ تے اوس اُہنوں اِہ آکھ کے اہدے گھر نُوں گھل دتا۔ پئی تُوں پنڈ وچ بھی نہ وڑیں۔
۲۷۔ تد یِسُوع تے اہدے شاگرد قیصریہ فلپی دے پنڈاں وچ گئے۔ تے راہ وچ اوس اپنے شاگرداں کولوں اِہ پچھیا۔ پئی لوک کیہ آکھدے نے پئی میں کون ہاں ؟
۲۸۔ تے اُہناں اُہنوں آکھیا۔ یوحنا بپتسمہ دین والا تے کئی ایلیاہ تے کئی نبیاں وچوں اک۔
۲۹۔ پھیر اوس اُہناں نُوں پچھیا۔ تُسِیں کیہ آکھدے ہو پئی میں کون ہاں؟پطرس نے اُہنوں جواب دے کے آکھیا ۔ تُوں مسیح ہیں۔
۳۰۔ تد اوس اُہناں نُوں تا کید کیتی پئی میری بابت کسے نُوں اِہ گل نا دسو۔
۳۱۔ پھیر اُہ اُہناں نُوں سکھالن لگا پئی ضرور ہے ابنِ آدم بہت دکھ جھلے۔ تے اُہ بزرگاں تے سردار کاہناں تے فقیہاں تھوں رد کِیتا جائے۔ تے جانُوں ماریا جائے۔ تے تِناں دِناں پچھوں جی اُٹھے۔
۳۲۔ تے اوس اِہ گل کھول کے دَسّی تد پطرس اُہنوں اک پاسے لے جا کے اُہنوں جھڑکن لگا۔
۳۳۔ پر اوس منہ پھیر لیا۔ تے اپنے شاگرداں ول ویکھ کے پطرس نُوں جھڑکیا۔ تے آکھیا اے شیطان میرے اَگوں دُور ہوجا۔ کیوں جو تُوں خدا دیاں گلاں دا نہیں پر بندیاں دیاں گلاں دا دھیان رکھنا ہیں۔
۳۴۔ تد اوس بھیڑ نُوں اپنے شاگرداں سنے کول سدیا تے اُہناں نُوں آکھن لگا پئی جے کوئی میرے پچھے آونا چاہے۔ اُہ اپنا انکار کر ےاپنی صلیب چک کے میرے مگر ٹر پئے۔
۳۵۔ کیوں جوجہڑا اپنی جان بچانی چاہے سو اُہنوں گوائے گا۔ پر جہڑا میرے لئی تے انجیل دے لئی اپنی جان گنواوے سو اہنُوں بچاوئیگا۔
۳۶۔ کیوں جو آدمی نُوں کیہ فایدہ ہوئے گا۔ جے ساری دنیا نُوں کماوے تے اپنی جان دا نقصان کرے۔
۳۷۔ بندہ اپنی جان دے بدلے کیہ دیوے؟
۳۸۔ کیوں جو جہڑا ایس زناہیں تے گناہیں پیڑھی دے وچ میتھوں تے میری کلام تھوں شرمائے گا۔ ابنِ آدم بھی اُہدے تھوں شرمائےگا جس ویلے اُہ اپنے باپ دے جلال نال پاک فرشتیاں دے نال آوئے گا۔

۱۔ تے اوس اُہناں نُوں آکھیا۔ میں تُہانُوں سچ آکھنا ہاں پئی بعضے جِہڑے ایتھے کھلوتے نے۔ جد تِیکر خدا دی بادشاہی نُوں قدرت نال آیاں نہ ویکھن گے کدی موت دا مزہ نہ چکھن گے۔
۲۔ تےچھیاں دِناں پچھوں یِسُوع پطرس تے یعقوب تے یوحنا نُوں نال لیا۔ تے اہناں نُوں اِک اُچے پہاڑ اُتے الگ اکلیاں لے گیا۔ تے اُہدا روپ اُہناں دے سامنے بدل گیا۔
۳۔ تے اُہدے کپڑے لشکن لگے تے بڑے چٹے ہو گئے۔ تے اجہے پئی دنیا وچ کوئی چھینبا اہو جہے چٹے نہیں کر سکد ا۔
۴۔ تد ایلیاہ موسیٰ دے نال اُہناں نُوں وکھائی دِتا۔ تے اُہ یِسُوع دے نال گلّاں کردے سان۔
۵۔ تد پطرس یِسُوع نُوں آکھیا۔ اے ربّی ساڈا ایتھے رہنا چنگا ہے۔ تے اسیں ترے ڈیرے بنائیے۔ اک تیرے لئی۔ تے اک موسیٰ لئی۔ تے اک ایلیاہ دے لئی۔
۶۔ کیوں جو اُہ نا سی جاندا پئی اگوں کیہ جواب دے۔ کیوں جو اُہ بہت ڈر گئے سان۔
۷۔ تداِک بدل آیا۔ تے اُہناں اُتےچھاں کیتی۔ تے بدل وچوں اک آواز آئی۔ پئی اِہ میرا پیار بیٹا ہے۔ اُہدی سُنو۔
۸تے اوسے ویلے اُہناں چو پھیرے دھیان کر کے بناں اکلے یِسُوع دے پھیر ہور کِسے نُوں اپنے نال نہ ڈِٹھا۔
۹۔ تے پہاڑوں اُتردیاں اوس اُہناں نُوں حکم کیتا پئی جو کجھ تُساں ویکھیا جد تیکر ابن ِآدم مُردیاں وچوں جی نا اُٹھے۔ تد تیکر کسے نُوں نا دسنا۔
۱۰۔ تے اُہناں ایس گل نُوں آپو وچ رکھیا۔ تے اک دوجے نال چرچا کر دے سان پئی مُردیاں وچوں جی اٹھنا کیہ ہے ؟
۱۱۔ تے اُہناں اِہ اُہنوں پچھیاپئی فقیہ تے آکھدے نے پئی پہلے ایلیاہ داآنا ضرور ہے۔
۱۲۔ تے اوس اُہناں نُوں آکھیا۔ ایلیاہ تے ٹھیک پہلاں آن کے سب کجھ سدھاردا ہے۔ تے ابنِ آدم دے حق وچ کیکر لکھیا ہے۔ پئی اُہ بڑا دکھ جھلے گا تے ناچیز سمجھیا جائیں گا۔
۱۳۔ پر میں تہانُوں آکھناں ہاں۔ پئی ایلیاہ آ بھی گیا ہے ۔ تے نالے جیہا اُہدے حق وچ لکھیا گیا ہے۔ اُہناں دا جو کجھ دل کیتا سوئی اہدے نال کیتا۔
۱۴۔ تے جاں شاگرداں کول آیا تاں اُہناندے چوپھیرے بڑی بھیڑ تے فقیہاں نُوں اُہناں دے نال بحث کردیاں ویکھیا۔
۱۵۔ تے اونویں ساری بھیڑاُہنوں ویکھ کے بڑی حیران ہوئی۔ تے لوکاں نے اُہدے ول دوڑ کے اُہنوں سلام کیتا۔
۱۶۔ تد اوس اُہناں نُوں پچھیا۔ تُسِیں اِہناں نال کیہ بحث کردے ہو ؟
۱۷۔ تے بھیڑ وچوں اِک نے اُہنوں جواب دتا۔ اے اُستاد۔ میں اپنے پتر نُوں تیرے کول لیاندا ہے۔ اُہنوں گونگی روح چمبڑی ہوئی ہے۔
۱۸۔ تے اُہ جتھے کتے اُہنوں پھڑدی ہے اوتھے ہی پٹکا دیندی ہے تے اُہ جھگ چھڈدا ہے۔ تے دند پہیندا ہے۔ تے سُکدا جاندا ہے۔ تے میں تیرے شاگرداں نُوں آکھیا سی۔ پئی اُہ اِہنوں کڈھ دین۔ تے اُہ اُہنوں کڈھ ناسکے۔
۱۹۔ اوس جواب دے کے اُہناں نُوں آکھیا۔ اے بے اعتبار قوم ؟میں کد توڑی تُہاڈے نال رہا ں گا ؟کد توڑی تُہاڈی سہاں گا؟اُہنوں میرے کول لیاؤ۔
۲۰۔ تے اُہناں اُہنوں اُہدے کول لیاندا۔ تے جد اوس اُہنوں ویکھیا اونویں روح اُہنوں مروڑیا۔ تے اُہ زمین اُتے ڈگا۔ تے جھگ چھڈ کے لیٹن لگا۔
۲۱۔ تد اوس اُہدے پیو کولوں پچھیا کنیک چر تھوں اِہدا اِہ حال ہویا ہے ؟اوس آکھیا۔ نِکے ہندیاں تھوں۔
۲۲۔ تے اوس اُہنوں بہتیری واری اہدا ناس کرن لئی اَگ وچ تے پانی وچ بھی سٹیا۔ پر جے تُوں کجھ کر سکنا ئیں تاں ساڈے اُتے ترس کھاکے ساڈی مدد کر۔
۲۳۔ یِسُوع نے اُہنوں آکھیا۔ جے تُوں کر سکنا ہیں ؟ایمان لیان والے لئی تے سب کجھ ہو سکدا ہے۔
۲۴۔ اوس لڑکے دے پیو نے اونویں اُچی آواز نال آکھیا۔ میں ایمان لیاونا ہاں۔ میرے ایمان دے گھاٹے دا علاج کر۔
۲۵۔ جد یِسُوع نے ویکھیا پئی لوک بھج کے اکٹھے ہندے جاندے نے۔ تد اوس پلیت روح نُوں جھڑکیا۔ تے اُہنوں آکھیا۔ اے گونگی بولی رُوح۔ میں تینُوں حکم کرنا ہاں۔ اُہدے وچوں باہر نکل۔ تے اُہدے وچ مڑ کدی نہ وڑیں۔
۲۶۔ اُہ چیک مارکے تے اُہنوں بہت مروڑ کے اُہدے وچوں باہر نکل گئی۔ تے اُہ لڑکا مردے وانگوں ہوگیا۔ ایتھوں تیکر پئی بہتیریاں آکھیا اُہ مر گیا۔
۲۷۔ تد یِسُوع اُہدا ہتھ پھڑ کے اُہنوں اُٹھالیا۔ تے اُہ اُٹھ کھلوتا۔
۲۸۔ تے جد اُہ گھر وچ آیا۔ اُہدے شاگرداں نے وکھ ہوکے اُہدے اَگے عرض کیتی۔ پئی اسیں اُہنوں کیوں نہ کڈھ سکے۔
۲۹۔ تے اوس اُہناں نُوں آکھیا۔ اِہ ذات دُعا بناں کسے ہور طرح نہیں نِکل سکدی۔
۳۰۔ تے اوتھوں ٹُر کے اُہ گلیل وچوں دی لنگھ گئے۔ تے اُہ نہیں چاہندا سی پئی کسے نُوں خبر ہووے۔
۳۱۔ ایس لَئی پئی اُہ اپنے شاگرداں نُوں سکھالدا۔ تے اُہناں نُوں آکھدا سی پئی ابن ِآدم بندیاں دے ہتھیں پھڑوایا جاندا ہے۔ تے اُہ اُہنوں مارسٹن گے تے مر جان تھوں ترے دن پچھوں اُہ پھیر جی اُٹھے گا۔
۳۲۔ پر اُہناں اِہ گل نہ سمجھی۔ تے اُہنوں پچھن لئی ڈردے سان ۔
۳۳۔ تے اہ کفر ناحُم وِچ آئے تے جد اُہ گھر وچ سی اوس اُہناں کولوں پُچھیا۔ پئی تُسِیں راہ وچ کیہ گل بات کردے ساؤ۔
۳۴۔ پر اُہ چُپ ئی رہے کیوں جو اُہناں واٹےاِک دُوجے نال اِہ بحث کِیتی سی پئی وڈا کہڑا ہے ؟
۳۵۔ تے اوس بہہ کے اُہناں باراں نُوں سدّیا۔ تے اُہناں نُوں آکھیا۔ جے کوئی پہلا ہونا چاہے تاں اُہ سنبھناں تُوں پچھلا۔ تے ساریاں دا ٹہلیا ہووے۔
۳۶۔ تے اوس اک ایانے نُوں لے کے اُہناں دے وچگھار کھلیاریا۔ تے اُہنوں کچھڑ چک کے اُہناں نُوں آکھیا۔
۳۷۔ جو کوئی میرے ناں کر کے اہو جہے ایانیاں وچوں اک نُوں قبول کر دا ہے۔ سو مینُوں قبول کردا ہے۔ تے جو کوئی مینُوں قبول کردا ہے۔ سو مینُوں نہیں پر اُہنوں جس مینُوں گھلیا قبول کردا ہے۔
۳۸۔ یُوحنا اُہنوں آکھیا۔ اُستاد ۔ اساں اک نُوں تیرا ناں لے کے پلیت روحاں نُوں کڈھدیاں ویکھیا۔ تے اساں اُہنوں منع کیتا۔ کیوں جو اُہ ساڈے پچھے نہیں سی ٹردا۔
۳۹۔ پر یِسُوع آکھیا۔ اُہنوں نا منع کرو کیوں جو اجہیا کوئی نہیں۔ جہڑا میرا ناں لے کے کرامات وکھاے تےمینُوں چھیتی بُرا آکھ سکے۔
۴۰۔ کیوں جو جہڑا ساڈا مخالف نہیں سو ساڈے وَل ہے۔
۴۱۔ کیوں جو جہڑا اِک کٹورا پانی تُہانُوں پیاوے ایس کر کے پئی تُسِیں مسیح دے ہو۔ میں تہانُوں سچ آکھنا ہاں۔ پئی اُہ اپنا پھل پائے بناں کدی نہ رہے گا۔
۴۲۔ تے جے کوئی اُہناں نِکیاں وچوں جِہڑے میرے اُتے ایمان لیاوندے نے اک نُوں ٹھوکر کھوائے۔ اُہدے لئی اِہ چنگا سی۔ پئی چکی دا پڑا اُہددے گل وچ پایا جاندا تے اُہ سمندر وچ سُٹیاجاندا۔
۴۳۔ تے جے تیرا ہتھ تینُوں ٹھوکر کھواوے اُہنوں وڈھ سُٹ۔ زندگی وچ ٹنڈا ہو کے وڑنا اُہدے نالوں چنگا ہے پئی دو ہتھ ہندیاں تُوں جہنم دی اوس اَگ وچ سٹیا جائیں جہڑی بجھدی نہیں۔
۴۵۔ تے جے تیرا پیر تینُوں ٹھوکر کھوائے اُہنوں وڈھ سٹ۔ زندگی وچ لنگیاں ہو کے وڑنا تیرے لئی اُہدے نالوں چنگا ہے۔ پئی دو پیر ہندیاں جہنم وچ سٹیا جائیں۔
۴۶۔ [جھتے اُہناں دا کیڑانہیں مردا تے اَگ نہیں بجھ دی]۔
۴۷۔ تے جے تیری اکھ تینُوں ٹھوکر کھوائے۔ تاں اُہنوں کڈھ سٹ۔ خدا دی بادشاہی وچ کانیاں ہو کے وڑنا تیرے لئی اُہدے نالوں چنگا ہے پئی دو اکھیاں ہنددیاں جہنم وچ سٹیا جائیں۔
۴۸۔ جھتے اُہناں دا کیڑا نہیں مردا تے اگ بُجھ دی۔
۴۹۔ کیوں جو ہر کوئی اَگ نال سلونا کیتا جائے گا۔
۵۰۔ لُون چنگی چیزہے۔ پر جیکر لُون بے سوٰداہوجائے تاں کاہد ے نال اُہنوں مزیدار کرو گے ؟سو اپنے وچ لون رکھو تے آپو وچ ملے رہو۔

۱۔ تے اُہ اُتھوں اُٹھ کے یہودیہ دیاں حداں وچ تے یردن دے پار آیا تے بہت لوک اُہدے کول پھیر اکٹھے ہوئے۔ تے اُہ اپنے دستور موجب پھیر اُہناں نُوں تعلیم دین لگا۔
۲۔ تے فریسیاں اُہدے کول آکے اُہدے ازامان لئی اُہدے تھوں سوال پچھیا۔ پئی آدمی نُوں روا ہے پئی وہٹی نُوں چھڈ دے۔
۳۔ اوس اُہناں نُوں جواب دے کے آکھیا۔ پئی موسیٰ تہانُوں کیہ حکم دِتا؟
۴۔ اُہ آکھن لگے موسیٰ تے اجازت دتی پئی طلاق لکھ کے چھڈ دین۔
۵۔ یِسُوع نے اُہناں نُوں آکھیا۔ تہاڈی سخت دلی دے سبب اوس تہاڈے واسطے اِہ حکم لکھیا۔
۶۔ پر خلقت دے مڈھوں اوس اُہناں نُوں نر تے ناری بنایا۔
۷۔ ایس کر کے آدمی اپنے ماں باپ نُوں چھڈے گا تے اپنی وہٹی نال ملیا رہے گا۔
۸۔ تے اُہ دونویں اک بدن ہوگے ۔ سو اُہ اگے نُوں دو نار ہے پر اک بدن نے۔
۹۔ سو جہنُوں خدا جوڑ دتا اُہنوں آدمی اڈنا کرے۔
۱۰۔ تے گھر وچ شاگرداں نے ایس گل دی بابت پھیر اُہدے تھوں پُچھیا۔
۱۱۔ تےاوس اُہناں نُوں آکھیا۔ پئی جے کوئی اپنی وہٹی نُوں چھڈے تے دوجی نال ویاہ کرےاُہ اُہدے حق وچ زنا کردا ہے۔
۱۲۔ تےجیکر اُہ آپ اپنے گھر والے نُوں چھڈے تے دوجے نال ویاہ کرے اِہ بھی زنا کردی ہے۔
۱۳۔ تے لوک نکے بچیاں نُوں اُہدے کول لیائے پئی اُہ اہناں نُوں چھوئے۔ پر شاگرداں اُہناں نُوں ورجیا۔
۱۴۔ یِسُوع اُہ ویکھ کے بہت ناراض ہویا۔ تے اُہناں نُوں آکھیا۔ نکے بچیاں نُوں میرے کول آون دیو۔ اہناں نُوں نا روکو۔ کیوں جو خدا دی بادشاہی اِہناں جہیاں دی ہے۔
۱۵۔ میں تہانُوں سچ آکھنا ہاں۔ پئی جو کوئی خدا دی بادشاہی نُوں نِکے بچے وانگوں نہ منے اُہ اُہدے وچ کدی نہیں وڑے گا۔
۱۶۔ تے اوس اُہناں نُوں کچھڑ چکیا تے اُہناں اُتے ہتھ پھیر کے اُہناں نُوں برکت دِتّی۔
۱۷۔ تے جد اُہ راہ وچ لگا جاندا سی اِک جنا اُہدے کول آیا۔ تے اَگے گوڈے نو کے اہنُوں پچھیا اے نیک اُستاد میں کیہ کراں پئی ہمیشہ دی زندگی دا وارث ہوواں ؟
۱۸۔ یِسُوع اُہنوں آکھیا۔ تُوں مینُوں نیک کاہنوں آکھنا ہیں ؟کوئی نیک نہیں ہے بناں خدا دے۔
۱۹۔ تُوں حکماں نُوں جاننا ئیں۔ خون نہ کر۔ زنا نہ کر۔ چوری نہ کر۔ جھوٹھی گواہی نہ دہ۔ فریب نہ دہ۔ اپنے ماں پیو دِی آدر کر۔
۲۰۔ اوس اُہنوں آکھیا اے اُستاد اِہناں ساریاں گلاں نُوں میں اپنے نکیاں ہندیاں تھوں مندا آیا ہاں۔
۲۱۔ یِسُوع اُہدے ول ویکھ کے اُہنوں پیار کیتا۔ تے اُہنوں آکھیا تیرے وچ اک گل دا گھاٹا ہے۔ جا۔ تے جو کجھ تیرا ہے۔ ویچ تے غریباں نُوں دہ۔ تاں تینُوں اَسماناں وچ خزانہ ملےگا۔ تےآ۔ میرے پچھے ٹُرپو۔
۲۲۔ اہ ایس گلوں بڑا اُداس ہویا۔ تے اُداس ہو کے ٹُر گیا۔ کیوں جو اُہ بڑا مالدار سی۔
۲۳۔ تے یِسُوع چو پھیرے ویکھ کے اپنے شاگرداں نُوں آکھیا۔ خدا دی بادشاہی وچ دولت منداں دا وڑنا بڑا اوکھا ہے۔
۲۴۔ تے شاگرد اُہدیاں گلاں تھوں حیران ہوئے۔ تے یِسُوع پھیر اُہناں نُوں آکھیا۔ بچیو جِہڑے لوک دولت اُتے آسرا رکھدے نے اُہناں نُوں خدا دی بادشاہی وچ وڑنا بڑا ہی اوکھا ہے۔
۲۵۔ سوئی دے نکے وچدوں اوٹھ دا لنگنا اُہدے نالوں سکھالا ہے پئی دولت مند آدمی خدا دی بادشاہی وچ وڑے۔
۲۶۔ تے اُہ بڑے ئی حیران ہو کے اُہنوں آکھن لگے پھیر کدی نجات ہو سکدی ہے ؟
۲۷۔ یِسُوع اُہناں ول ویکھ کے آکھیا۔ بندیاں لئی تے اِہ اَہنونا ہے۔ پر خدا لئی نہیں ۔ خدا تھوں تے سب کجھ ہو سکدا ہے۔
۲۸۔ پطرس اہنُوں آکھن لگا۔ ویکھ اساں سب کجھ چھڈیا تے تیرے مگر ٹر پئے۔
۲۹۔ یِسُوع آکھیا۔ میں تہانُوں سچ آکھنا ہاں اجیہا کوئی نہیں پئی جس گھر یا بھرانُوں یا بھیناں یا ماں پیو یا بال بچیاں یا زمین نُوں میرے تے انجیل دے لئی چھڈیا ہے۔
۳۰۔ تے ہن ایس سمے وچ اُہ سو حصے ودھ نہ پاوے ۔ گھرتے بھرانُوں تے بھیناں تے مانواں تے بال بچیاں تے زمیناں نُوں۔ پر دُکھاں نال تے آون والے زمانے وچ ہمیشہ دی زندگی۔
۳۱۔ پر بہتیرے جِہڑے پہلے نے پچھلے ہون گے۔ تے پچھلےپہلے۔
۳۲۔ تے اُہ یروشلیم دے راہ جاندے سان۔ تے یِسُوع اہناں دے اَگے اَگے ٹر دا جاندا سی تے اُہ حیران ہوئے تے مگر آؤن والے ڈردے سان۔ تے پھیر اُہ باراں نُوں نال لے کے جو کُجھ اُہدے اُتے ہونا سی۔ اُہناں نُوں دسن لگا۔
۳۳۔ پئی ویکھو ایسں یروشلیم نُوں جانے ہاں۔ تےابن آدم سردار کاہناں تے فقیہاں دے حوالے کیتا جائے گا تے اُہ اُہنوں مار سٹن دا حکم دین گے۔ تے اُہنوں غیر قوماں دے حوالے کرن گے۔
۳۴۔ تے اُہ اہدے نال مخول کرن گے۔ تے اہدے اُتے تھکن گے۔ کوٹڑے مارن گے تے اُہنوں قتل کرن گے ۔ تے تناں دِناں پچھوں اُہ پھیر جی اُٹھے گا۔
۳۵۔ تدزبدی دےپتراں یعقوب تے یوحنا اُہدے کول آکے اُہنوں آکھیا۔ اے اُستاد۔ اسیں چاہنے ہاں۔ پئی جو کجھ تیتھوں منگئے سوئی تُوں ساڈے لئی کریں۔
۳۶۔ اوس اُہناں نُوں آکھیا۔ تُسِیں کیہ چاہندے ہو۔ پئی میں تہاڈے لئی کراں ؟
۳۷۔ اُہناں اُہنوں آکھیا۔ سانُوں اِہ بخش پئی اسیں اک تیرے سجے تے اِک کھبے تیرےجلال وچ بیٹھے۔
۳۸۔ یِسُوع اُہناں نُوں آکھیا۔ تُسِیں نہیں جاندے پئی کیہ منگ دے ہو۔ بھلا تُسِیں اِہ پیالہ پی سکدے ہو جہڑا میں پینا ہَے۔ یا اُہ بپتسمہ جہڑا میں لینا ہے۔ تُسِیں لے سکدے ہو؟
۳۹۔ اُہناں اُہنوں آکھیا ساتھوں ہو سکدا ہے۔ یِسُوع اُہناں نُوں آکھیا۔ جہڑا پیالہ میں پینا ہے تُسِیں پیو گے۔ تے جہڑا بپتسمہ میں لینا ہے تُسِیں لوگے۔
۴۰۔ پر اُہناں دے بناں جنہاں لئی تیار کیتا گیا ہے کسے نُوں اپنے سجے یا کھبے بہانا میرا کم نہیں ہے۔
۴۱۔ تےجاں دساں شاگرداں نے اُہ سنیا۔ تاں اُہ یعقوب تے یوحنا نال غصے ہون لگے۔
۴۲۔ تد یِسُوع اُہناں نُوں اپنے کول سد کے آکھیا۔ تُسِیں جاندے ہو پئی جِہڑے غیر قوماں دے حاکم گنے جاندے نے۔ تے اُہناں اُتے دب کے حکومت جتاندے نے۔ اُہ اُہناں د ےسردار زور نال اُہناں اُتے اختیا ر چلاندے نے۔
۴۳۔ پر تہاڈے وچ اجہیا نہیں ہے۔ سگوں جہڑاسو تہاڈے وچ وڈا ہونا چاہے۔ سو تہاڈا ٹہلیا ہووے۔
۴۴۔ تے تُہاڈے وچوں جہڑا سردار بننا چاہے۔ سو ساریاں دا نوکر بنے۔
۴۵۔ کیوں جو ابن ِآدم بھی اپنی ٹہل کرن لئی نئیں سگوں ٹہل کرن لئی تے بُہتیاں واسطے اپنی جان دین نُوں آیا ہے۔
۴۶۔ تے اُہ یریحو وچ آئے۔ تے جد اُہ تے اُہدے شاگرد تے بہت لوک یریحو تھوں نکل دے سان تمائی دا پُتربرتمائی اِک انھا منگتا راہ دے کِنارے بیٹھا ہویا سی۔
۴۷۔ تے اُہ سن کے پئی اُہ یِسُوع ناصری ہے ۔ اُچی اُچی آکھن لگا۔ اَے داؤد دے پُتر یِسُوع ۔ میرے اُتّے رحم کر۔
۴۸۔ تے بُہتیاں اُہنوں ورجیا پئی چپ کر پر اوس ہور بھی زور نال پُکار یا۔ پئی اے داؤد دے پُتر۔ میرے اُتے رحم کر۔
۴۹۔ تد یِسُوع کھلوکے حکم دِتا۔ پئی اُہنوں سد لو تے اُہناں اوس اَنّھے نُوں اِہ آکھ کے سدیا پئی حوصلہ کر۔ اُٹھ اُہ تینُوں سددا ہے۔
۵۰۔ اُہ اپنا کپڑا سٹ کے اُٹھ کھلوتا۔ تے یِسُوع کول آیا۔
۵۱۔ تے یِسُوع اُہنوں آکھیا۔ تُوں کیہ چاہناہیں۔ پئی میں تیرے لئی کراں ؟ اوس اَنّھے آکھیا۔ اے اُستاد اِہ پئی میں سوجاکھا ہو جاواں۔
۵۲۔ یِسُوع اُہنوں آکھیا جا تیرے ایمان تینُوں بچایا۔ اونویں ہی اُہ سُجاکھا ہوگیا تے راہ وچ اُہدے مگر ٹُر پیا۔

۱۔ تےجد یروشلیم دے نیڑے زتیون دے پہاڑکول بیت فگے تے بیت عنیا تیکر پہنچے۔ تاں اوس اپنے شاگرداں وچوں دو جنیاں نُوں گھلیا۔
۲۔ تے اُہناں نُوں آکھیا اوس پنڈنُوں جاؤ۔ جہڑا تہاڈے سامنے ہے تے اُہدے وچ وڑدیاں سار اک کھوتی دے بچے نُوں بدھاہویا تُسِیں ویکھو گے۔ جہدے اُتے کدی کوئی سوار نہیں ہویا۔ اُہنوں کھول لیاؤ۔
۳۔ تے جے کوئی تہانُوں آکھے۔ تُسِیں اِہ کیوں کردے ہو؟ تاں آکھو خداوندنُوں اِہدی لوڑ ہے۔ تےاُہ جھٹ پٹ مُڑاُہنوں ایتھے پرتا دے گا۔
۴۔ تے اُہ گئے۔ تے بچّے نُوں باہر دروازے دے کول جتھے دو راہا سی بدھا ہویا ڈٹھا۔ تے اُہنوں کھولیا۔
۵۔ تے کیاں اُہناں وِچّوں جِہڑے اوتھے کھلوتے سان اُہناں نُوں آکھیا۔ تُسِیں کیہ کردے ہو۔ پئی بچے نُوں کھول دے ہو؟
۶۔ تے اُہناں جیہا یِسُوع آکھیا سی اُہناں نُوں آکھیا۔ تاں اُہناں اُہناں نُوں جان دِتا۔
۷۔ تے اُہ اوس بچےنُوں یِسُوع کول لےآئے۔ تے اپنے کپڑے اُہدے اُتے پائے۔ تے اُہ اُہدے اُتے چڑھ بیٹھا۔
۸۔ بُہتیاں اپنے کپڑے راہ وچ وچھائے تے ہورناں پیلیاں وچوں پتر توڑکے اُہناں دا فرش وچّھا دِتا۔
۹۔ تے اُہ جہڑے اَگےاَگے جاندے تے مگر آوندے سان اُچی اُچی آکھدے سان۔ ہوشعنا۔ دھن اُہ جہڑا خدا دے ناں اُتے آوندا ہے۔
۱۰۔ دھن ساڈے پیو داؤد دی بادشاہی۔ جہڑی آوندی ہے۔ اَسماناں وچ ہوشعنا۔
۱۱۔ تے یروشلیم اَپڑ کے ہیکل وچ گیا۔ تے جد اوس چو نِہیں پاسیں سب کجھ ویکھ لیا۔ تد اُہ باراں نال بیت عنیا نُوں گیا۔ تے اودوں شام دا ویلا سی۔
۱۲۔ تے اگلے دن جد اُہ بیت عنیا تھوں باہر آئے تد اُہنوں بھکھ لگی۔
۱۳۔ تے اِنجیر دا اک رُکھ پتّراں نال لدیا ہویا دوروں دیکھ کے گیا۔ پئی شاید اُہدے وچوں کجھ ہتھ آوے۔ تے جد اُہدےنیڑے آیا تاں پتراں دے بناں اُہدے وچ کجھ نہ لبھّیا۔ کیوں جو انجیراں دی رُت نہیں سی۔
۱۴۔ تد اوس آکھیا۔ تیتھوں کوئی کدے بھی پھل نہ کھاوے۔ تے اُہدے شاگرداں اِہ گل سُنی۔
۱۵۔ پھیر اُہ یروشلیم وچ آئے۔ تے اوہ ہیکل دے اندر جاکے اُہناں نُوں جِہڑے ہیکل وچ ویچدے تے مُل لیندے سان۔ باہرکڈّھن لگا۔ تے صرافاں دے تختے تے کُبوتر ویچن والیا ں دیاں چولیاں اُلٹا دِتیاں۔
۱۶۔ تے کسے نُوں ہیکل وچوں دِی بھانڈا لے کے لنگھن نہ دِتا ۔
۱۷۔تے تعلیم دے کے اُہناں نُوں آکھیا ۔اِہ نہیں لکھیا ہے ۔پئی میرا گھر ساریاں قوماں دے لئی عبادت دا گھر اکھوائے گا؟ پر تُساں اُہنوں ڈاکواں دی کھوہ بنا دِتا ہے ۔
۱۸۔تے سردار کاہن تے سردار کاہن تے فقیہہ اِہ سن کے سوچ وِچ پئے ۔پئی اُہدا ناس کیکر کرئیے ۔کیوں جو اُہدے کولوں ڈردے سان ۔ایس لئی پئی سارے لوک اُہدی تعلیم تھوں حیران ہو گئے سان ۔
۱۹۔تے شام پیاں اُہ شہروں باہر جاندا ہُندا سی ۔
۲۰۔تے سویرے اُہناں اودھروں دی لنگھ دیاں ہویاں ڈٹھا ۔پئی انجیر دا درخت جڑھوں سُک گیا ہے ۔
۲۱۔تے پطرس چیتا کرکے اُہنوں آکھیا ۔اے رَبّی ۔ویکھ انجیر دا رُکھ جہنُوں تُوں لعنت دتی سُک گیا ہے۔
۲۲۔تے یِسُوع جواب دے کے اُہناں نُوں آکھیا خدا اُتے ایمان لیاؤ ۔
۲۳۔میں تُہانُوں سچ آکھنا ہاں پئی جو کوئی ایس پہاڑ نُوں آکھے پئی اُٹھ تے سمندر وچ جا پو۔تے اپنے من وچ شک نہ لیا وے ۔پر یقین کرے ۔پئی جو کجھ آکھنا ہاں اُہ ہندا ہے سو اُہدے لئی ہووے گا ۔
۳۴۔ایس لئی میں تُہانُوں آکھنا ہاں ۔پئی دعا منگدیاں سب کجھ جو تُسِیں منگدے ہو۔یقین کرو پئی اُہ تُہانُوں مل گیا ۔تاں تہاڈے لئی ہو جائے گا۔
۲۵۔تے جد کدی تُسِیں کھلے ہوئے دعا منگدے ہو ۔جیکر تہاڈا کسے اُتے گلہ ہووے اُہنوں معاف کرو ۔تاں جو تہاڈا باپ بھی جہڑا اَسماناں اُتے ہے تُہاڈے قصواں نُوں معاف کرے ۔
۲۶۔[تے جوں تُسِیں معاف نہیں کروگے تے تہاڈا باپ جہڑا اَسماناں تے ہے تہاڈے گناہ وی نہ معاف کرے گا ۔]
۲۷۔تےاُہ پھیر یروشلیم وچ آئے ۔تے جد اُہ ہیکل وچ پھردا سی ۔ تد سردار کاہن تے فقہیہ تے بزرگ اُہدے کول آئے۔
۲۸۔تے اُہنوں آکھن لگے ۔پئی تُوں کہڑے اختیار نال اِہ کم کرنا ہیں ؟ یا کس اِہ کم کرن دا تینُوں اختیار دِتا ۔
۲۹۔یِسُوع اُہناں نُوں آکھیا ۔میں تہاتھوں اِک گل پچھنا ہاں تُسِیں مینُوں جواب دیو۔ تاں میں تُہانُوں دساں گا ۔پئی کہڑے اختیار نال اِہ کم کرنا ہاں ۔
۳۰۔یوحنا دا بپتسمہ اَسمان وَلّوں سی یا بندیاں ولوں ؟مینُوں جواب دیو۔
۳۱۔تاں اُہنا ں آپو وچ وچار کرکے آکھیا ۔جے آکھئے اسمان ولّوں ۔تاں اُہ آکھئے گا پھیر تُساں اُہدا یقین کیوں نہ کیتا؟
۳۲۔پر جے آکھئے پئی بندیاں ولوں ۔اُہ لوکاں کولوں ڈردے سان ۔ایس لئی پئی سبھے یوحنا نُوں نبی مندے سان ۔
۳۳۔تے اُہناں یِسُوع نُوں جواب دِتا ۔اسیں نہیں جاندے ۔یِسُوع اُہناں نُوں آکھیا ۔میں بھی تہانُوں نہیں دسدا ۔پئی کہڑے اخیتار نال میں اِہ کم کرنا ہاِں۔

۱۔پھر اُہ اُہناں نُوں تمیثلاں دے کے آکھن لگا پئی اک بندے انگور داباغ لایا ۔تے اُہدے دوالے واڑ دِتّی ۔تے چوبچہ کڈھیا ۔تے بُرج اُساریا ۔تے اُہنوں مالِیاں نُوں سونپ کے پردیس ٹُرگیا۔
۲۔تے رُت سِراوس اِک نوکر مالیاں کول گھلیا ۔پئی مالیاں کولوں باغ دے پھل وچوں کجھ لیاوے ۔
۳۔تے اُہناں اُہنوں پھڑ کے کُٹیا تے سکھنے ہتھ موڑدِتا۔
۴۔تے اوس دوجی واری اک ہور نوکر نُوں اُہناں کول گھلیا ۔اُہناں کول گھلیا۔اُہناں اُہدا سر پاڑیا ۔تے اُہدی پت لاہ دتی ۔
۵۔تے اوس اک ہور نُوں گھلیا ۔تے اُہناں اُہنوں مارسُٹّیا ۔تے ہور بُہتیاں نُوں گھلیا ۔تے اُہناں کیاں نُوں کٹیا ۔تے کیاں نُوں مار سُٹیا۔
۶۔ہن اُہدے کول اِک سی ۔اُہدا پیارا پُتر ۔اوڑک اوس اُہنوں بھی اُہناں کول اِہ آکھ کے گھلیا ۔پئی اُہ میرے پُتر دی تاں آدر کرن گے ۔
۷۔پر اُہناں مالِیاں آپوں وچ آکھیا۔وارث اِہوہی ہے ۔آؤ اسیں اُہنوں مار سُٹئے۔تاں ورثہ ساڈا ہو جائے گا۔
۸۔تے اُہناں اُہنوں پھڑ کے مار دِتا ۔تے انگور دے باغوں کڈھ کے اُہنوں باہر سٹیا ۔
۹۔ہن باغ دا مالک کیہ کر یگا ؟ اُہ آویگا ۔تے اُہناں مالیاں نُوں جانوں مار کے انگور دا باغ ہورناں نُوں دے دے گا ۔
۱۰۔تُساں اُہ نوشتہ بھی نہیں پڑھیا ۔ پئی جس پتھر نُوں راجاں نے نا پسند کیتا۔اُہو ہی گُٹھ دا سرا بنیا ؟
۱۱۔اِہ خداوند دے ولوں ہویا ۔تے ساڈی نظر وچ اچر ج ہے ۔
۱۲۔تے اُہ اُہدے پھڑن دا موقعہ لبھدے سان ۔پر لوکاں کولوں ڈرے ۔کیوں جو اُہناں جان لیا۔پئی اوس اِہ تمثیل ساڈے اُتے آکھی سی ۔تے اُہنوں چھڈ کے ٹُر گئے ۔
۱۳۔تے اُہناں فریسیاں تے ہیرودیاں وچوں کیاں نُوں اُہدے کول گھلیا ۔پئی اُہنوں گلّاں دی پھائی وچ پھسان ۔
۱۴۔تے اُہناں اُہدے کول آکے آکھیا ۔پئی اے اُستاد ۔اسیں جاننے ہاں پئی تُوں سچا ہیں ۔تے تینُوں کسے دی پرواہ نہیں ۔کیوں جو تُوں بندیاں دا لحاظ نہیں کردا ۔پر تُوں سچائی نال خدا دا راہ دسنا ہیں ۔
۱۵۔قیصر نُوں جزیہ دنیا چاہیدا ہے یا نہیں ؟ اسیں دیئے یا نا دئیے ؟ ۔پر اوس اُہناں دا مَکر جان کے اُہناں نُوں آکھیا ۔مینُوں کیوں ازماوندے ہو ۔ دینار میرے کول لیاؤ ۔پئی میں ویکھاں ۔
۱۶۔سو اُہناں لیاندا تے اوس اُہناں نُوں آکھیا ۔اِہ مورت تے خرف کہدے نے ؟ اُہناں آکھیا ۔قیصر دے ۔
۱۷۔تد یِسُوع اُہناں نوں آکھیاجہڑیاں چیزاں قیصر دیاں نے ۔سو قیصر نُوں دیو۔تے جہڑیاں خدا دیاں نے خدا نُوں دیوتے اُہ اُہدے تھوں بہت حیران ہوئے ۔
۱۸۔تے صدوقی جِہڑے آکھدے نے پئی قیامت نہیں ہونی ۔اُہدے کول آئے۔تے اِہ سوال کیتا ۔
۱۹۔پئی اے اُستاد ۔ساڈے لئی موسیٰ لکھیا ہے ۔پئی جے کسے دا بھرا مر جائے ۔تے اہدی وہٹی نُوں رہے ۔تے اولاد نا ہووے تاں اُہدا بھرا اُہدی وہٹی نُوں کر لوے ۔تے اپنے بھرا لئی اولاد پیدا کرے ۔
۲۰۔ست بھرا سان ۔تے پہلے وہٹی کیتی ۔تے بے اولاد مر گیا ۔
۲۱۔تے دوجے اُہنوں کیتا ۔تے بے اولادمرگیا ۔تے ایسے طرح تریجا بھی ۔
۲۲۔تے ستے او ترے مرگئے ۔ساریاں دے پچھوں اُہ زنانی بھی مر گئی ۔
۲۳۔قیامت نُوں اُہ اُہناں چووں کہدی وہٹی ہووے گی ؟کیوں جو اُہ ستاں دے گھروسی سی ۔
۲۴۔یِسُوع اُہناں نُوں آکھیا۔تُسِیں ایس کر کے بھلیکھے وچ نہیں پئے ہو ! پئی نا کتاباں نُوں تے نا خدا دی قدرت نُوں جاندے ہو؟
۲۵۔پئی جد اُہ مردیاں وچوں اُٹھن گے نا ویاہ کرن گے نا ویاہیاں جانگیاں۔پر اَسمان دے فرشتیاں وانگوں ہون گے ۔
۲۶۔پر مُردیاں دی بابت پئی اُہ جی اُٹھدے نے تُساں موسیٰ دی کتاب وچ جھاڑی دِی گل وِچ پڑھیا نہیں پئی خدا نے اُہنوں کیکر آکھیا پئی میں ابراہیم دا خدا تے اضحاق دا خدا تے یعقوب دا خدا ہاں ۔
۲۷۔اُہ مردیاں دا خدا نہیں سگوں جیوندیاں دا خدا ہے ۔تُسِیں بڑی بھل وچ پئے ہوئے ہو۔
۲۸۔تد فقیہاں وچوں اِ ک اُہدے کول آیا ۔تے جاں اُہناں دی بحث سُنی ۔تے سمجھیا ۔پئی اوس اُہناں نُوں خوب جواب دِتا تاں اُہدے تھوں پچھیا ۔پئی ساریاں حکما ں وچوں کہڑا وڈا ہے ۔
۲۹۔یِسُوع اُہنوں جواب دِتا اول اِہ ہے ۔پئی سن اسرائیل ۔خدا نُوں ساڈا اک ہی خداوند ہے ۔
۳۰۔تے تُوں خداوند اپنے خدا نُوں اپنے سارے دل نال تے اپنی ساری جان نال تے اپنی ساری عقل نال تے اپنے سارے زور نال پیار کر ۔
۳۱۔دوجا اِہ ہے تُوں اپنے گوانڈھی نُوں اپنے جہیا پیار کر۔ اِہناں نالوں وڈا کوئی حکم نہیں ہے ۔
۳۲۔تد اوس فقیہہ اُہنوں آکھیا ۔ ٹھیک اے اُستاد ۔تُوں سچ آکھیا ۔پئی اُہ اک ہی ہے تے اُہدے باہجوں ہور کوئی نہیں ہے ۔
۳۳۔تے سارے دل نال تے ساری سمجھ نال تے سارے زور نال اُہنوں پیار کرنا تے گوانڈھی نُوں اپنے جیہا پیار کرنا سارِیاں قُربانِیاں ۔جہڑیاں اَگ اُتے ساڑِیاں جاندیاں نے چڑھاویاں نالوں وڈی گل ہے ۔
۳۴۔تے جدوں یِسُوع ویکھیا پئی اوس عقل نال جواب دِتا تاں اوس آکھیا تُوں خدا دی بادشاہی تھوں دُور نہیں ہیں تے ایدوں اگوں کسے دا حوصلہ نہ پیا پئی اُہدے تھوں سوال پچھے۔
۳۵۔تے یِسُوع ہیکل وچ تعلیم دنیدیاں آکھیا پئی فقیہہ کیکر آکھدے نے پئی مسیح داؤد دا پُتر ہے ؟
۳۶۔داؤد پاک روح دی راہیں آکھیا ۔پئی خُداوند نے میرے خُداوند نُوں آکھیا پئی تُوں میرے سجے پاسے بہو۔جد تیکر میں تیرے ویریاں نُوں تیرے پیر رکھن دی چوکی نہ کراں ۔
۳۷۔داؤد تے آپ اُہنوں خداوند آکھدا ہے ۔پھیر اُہ اُہدا پُترکتھوں ہویا ؟تے عام خاص خوشی نال اُہدی سُندے سان ۔
۳۸۔تے اوس اپنی تعلیم وِچ آکھیا پئی فقیہاں توں ہوشیاررہو۔ جِہڑے لمے کپڑے پاکے ٹُرنا پھرنا تے بازاراں وچ سلام لینا پسند کردے نے ۔
۳۹۔تے عبادتخانیاں وچ اگلیاں کُرسیاں تے ضیافت والے گھراں وچ اُچے تھاں چاہندے نے ۔
۴۰۔اُہ بیوہ عورتاں دے گھراں نُوں نگل جاندے نے ۔تے وکھالن لئی لمی چوڑی نماز پڑھدے نے ۔اُہناں نُوں زیادہ سزا ملے گی ۔
۴۱۔تے اُہ ہیکل دے خزانےدے سامنے بہہ کے ویکھداسی پئی لوک خزانے وچ کیکر پیسے پاندے نے تے بہترے نجتاوراں بہت کُجھ پایا ۔
۴۲۔تے اِک غریب بیوہ نے آکے دو دمڑیاں پائیاں جہناں دا اک دھیلا ہندا ہے ۔
۴۳۔تے اوس اپنے شاگرداں نُوں سدکے آکھیا ۔میں تُہانُوں سچ آکھنا ہاں پئی ایس غریب بیوہ اُہناں سبھناں نالوں جِہڑے خزانے وچ پاندے نے بہتاپادِتا ۔
۴۴۔کیوں جو سبھناں اپنی بچت وچوں پایا۔پر اوس اپنی تُھڑ وچوں جو کجھ اُہدے کول سی۔اپنی ساری پونجی پادِتی ۔

۱۔تے جد اُہ ہیکلوں باہر پیا جاندا سی ۔اُہدے شاگِرداں وچوں اک نے آکھیا۔اے اُستاد ۔ویکھ اِہ کہو جہے پتھر ۔تے کہیاں عمارتاں نے ۔
۲۔تے یِسُوع اُہنوں آکھیا ۔تُوں اِہناں وڈیاں عمارتاں نُوں ویکھنا ہیں ایتھے پتھراُتے پتھر نا چھڈیا جائے گا ۔جہڑا ڈیگیا نہ جائے ۔
۳۔تے جد اُہ زتیون دے پہاڑ اُتے ہیکل دے سامنے بیٹھا سی ۔پطرس تے یعقوب تے یوحنا تے اندریاس اکلیاں ہو کے اُہدے تھوں پچھیا ۔
۴۔پئی سانُوں دس اِہ گلاں کد ہو نگیاں ۔تے اوس سمے دا کیہ پتہ ہے ۔جدوں اِہ سبھ پوریاں ہون اتے آؤن گیاں ؟
۵۔یِسُوع اُہناں نُوں آکھن لگا ۔ہوشیار رہو ۔پئی تُہانُوں کوئی بُھلاوے وچ نہ پاوے ۔
۶۔بہتیرے میرے ناں اُتے اِہ آکھدے آون گے ۔پئی میں اُہوئی ہاں ۔تے بہتیاں نُوں بُھلان گے ۔
۷۔تے جد لڑائیاں تے لڑائیاں دِیاں اوائیاں سنوتاں گھبرا نہ جانا اِہناں گلاں دا ہونا ضرور ہے پر اجے آخر نہیں ۔
۸۔کیوں جو قوم قوم اُتے ۔تے بادشاہی بادشاہی اُتے چڑھائی کر ےگی ۔تھاں تھاں بھوچال آؤن گے تےکال پین گے ۔اِہ گلاں مُصیبتاں دا شروع ہے۔
۹۔پرتُسِیں خبردار رہو ۔کیوں جو اُہ تُہانُوں مجلساں دے حوالے کرن گے ۔تے عبادت خانیاں وِچ تُسِیں مار کھاوگے ۔تے حاکماں تے بادشاہاں دے اَگے میرے سببوں کھلے کیتے جاؤ گے ۔تا ں جو اُہناں دے لئی گواہی ہووے ۔
۱۰۔تے ضرور ہے۔ پئی ساریاں قوماں دے اَگے انجیل دی منادی پہلاں کیتی جائے ۔
۱۱۔تے جاں تُہانُوں پھڑوا کے لے جان گے ۔تاں پہلاں ئی چنتا نہ کرنا۔پئی اسیں کیہ آکھاں گے ۔پر جو کجھ اوس گھڑی تُہانُوں بخشیا جائے ۔سوئی۔آکھنا۔کیوں جو آکھن والے تُسِیں نہیں ہو ۔پر پاک روح ۔
۱۲۔تے بھرا بھرا نُوں ۔تے پیو بچے نُوں مروان لئی پھڑان گے ۔تے بچے اپنے ماپیاں دا سامنا کرن گے ۔
۱۳۔تے اُہناں نُوں مار سُٹن گے ۔تے میرے ناں دے سبب سب لوک تُہاڈے وَیری ہون گے ۔پر جو کوئی آخر توڑی قائم رہے گا ۔سوئی نجات پائے گا۔
۱۴۔تے جس ویلے اوس اُجاڑن والی گھنونی چیزنُوں اوس تھاں کھلوتی ویکھو ۔جِتھے اُہدا ہونا نہیں چاہیدا (پڑھن والا سمجھ لئے ) تد اُہ جِہڑے یہودیہ وچ ہون پہاڑاں نُوں بھج جان ۔
۱۵تے اُہ جِہڑا کوٹھے اُتے ہووے ہیٹھاں نا اُترے ۔تے اپنے گھروں کجھ کڈھن لئی اندر نہ وڑے ۔
۱۶۔تے جہڑا پیلی وچ ہووے ۔اپنے کپڑے لین نُوں پچھاں نہ مُڑے ۔
۱۷۔پر افسوس اُہناں اُتے۔ جہڑیاں اُہناں دِناں وچ گربھ والیاں تے دودھ پیان والیاں ہون ۔
۱۸۔تُسِیں دعامنگو پئی اِہ سیال وچ نہ ہووے ۔
۱۹۔کیوں جو اُہناں دِناں وچ ایڈی مُصِیبت ہووے گی ۔پئی خلقت دے مڈھوں لَے کے جہنوں خدا بنایا ہے ۔ہُن توڑی نہ ہوئی ہے ۔تے نہ کدی ہووے گی ۔
۲۰۔تےجیکر خداوند اُہناں دِناں نُوں ناگھٹاند ا ۔تاں اِک بندہ بھی نہ بچدا ۔پر اُہناں چُنیاں ہویاں دی خاطر جنہاں نُوں اوس چُنیا ہے ۔اوس اُہناں دِناں نُوں گھٹا یا۔
۲۱۔تے اوس ویلے جے کوئی تُہانُوں آکھے ۔پئی ویکھو ۔مسیح ایتھے ہے ۔یا ویکھو ۔اوتھے ہے ۔تاں سچ نہ منناں ۔
۲۲۔کیوں جو جھوٹے مسیح تے جھوٹے نبی اُٹھن گے ۔تے نشان تے اچرج کم وکھان گے ۔تاں جو جے اُہ چُنیاں ہویاں نُوں بھلان ۔
۲۳۔پر تُسِیں ہو ۔ویکھو ۔میں تُہانُوں پہلاں ئی سبھو کجھ دَس دِتّا ہے ۔
۲۴۔پر اہناں دِناں وچ اوس مصیبت دے پچھوں سُورج ہنیرا ہوجاوے گا ۔تے چن اپنی روشنی نہ دے گا ۔
۲۵۔تےاَسمانُوں تارے ڈگ پین گے تے قوتاں جہڑیاں اَسماناں وچ نے ہلائیاں جانگیاں ۔
۲۶۔تے اوس ویلے ابن آدم نُوں بڑی قدرت جلال نال بدلاں اُتے آوندیاں ویکھو گے۔
۲۷۔تے اوس ویلے اُہ فرشتیاں نُوں گھلے گا۔تے چوہاں گُٹھاں تھوں زمین دی حدوں اَسمان دی حد تیکر اپنے چُنیاں ہویاں نُوں اکٹھے کرے گا۔
۲۸۔پھیر انجیر دے بوٹے دی تمثیل سِکھو جاں اُہدی ٹہنی نرم ہندی تے پتر پُھٹدے نے ۔تاں جان لیندے ہوپئی گرمی دی رُت آئی ہے ۔
۲۹۔ایسے طرح تُسِیں جاں اِہ گلاں ہندیاں ویکھو ۔تاں جانو پئی اُہ نیڑے۔سگوں بُوہے اُتّے ہے ۔
۳۰۔میں تُہانُوں سچ آکھنا ہاں پئی جد تِیکر اِہ سب کجھ نا ہو لَوے ایس زمانے دے لوک گُزر نہ جانگے ۔
۳۱۔اَسمان تے زمین ٹل جان گے ۔پر میریاں گلاں کدے نہ ٹلن گِیاں ۔
۳۲۔پر اوس دن یا اوس گھڑی دی بابت بناں باپ دے کوئی نہیں جاندا نہ تے فرشتے اَسمان وچ ۔تے نا بیٹا ۔
۳۳۔خبردار رہو ۔جاگدے رہو تے دعا منگو ۔کیوں جو تُسِیں نہیں جاندے پئی اُہ ویلا کد ہووے گا ۔
۳۴۔اِہ اِک پردیس وِچ گئے ہوئے آدمی وانگر ہے جس گھروں نکلدے ویلے اپنے نوکراں نُوں اختیار دِتا ۔ہر اک نُوں اُہدا کّم دس دِتا تے دربان نُوں حکم کیتا پئی جاگدا رہے ۔
۳۵۔سو جاگدے رہو کیوں جو تُسِیں نہیں جاندے ۔پئی گھر دا مالک کہڑے ویلے آوندا ہے ۔شام نُوں یا ادھی رات نُوں یا ککڑ دی بانگ دے ویلے ۔یا جھلانک نُوں ۔
۳۶۔اجہیا نہ ہووے پئی آکے اُہ تُہانُوں ستیاں پاوے ۔
۳۷۔تے کُجھ میں تہانُوں آکھناہاں سوساریاں نُوں آکھنا ہاں ۔جاگدے رہو۔

۱۔دو دِناں پچھوں فسح تے پتیری روٹی دی عید سی ۔تے سردار کاہن تے فقیہہ کھوج وچ لگے ہوئے سان پئی اُہنوں کیکر داء نال پھڑ کے جانوں ماریئے ۔
۲۔اُہناں آکھیا ۔عید دے دن نہیں ۔کتے لوکاں وچ بلوہ ہووے ۔
۳۔تے جد اُہ بیت عنیاوچ شمعون کوڑھے دے گھر کھان بیٹھا سی ۔اک عورت بڑے مُل والا جٹاماسی دا کھرا عطر شیشی وچ لیاندا ۔تے شیشی نُوں توڑ کے اُہدے سر اتے ڈوھلیا ۔
۴۔تد کئی اپنے من وچ کِھجدے سان پئی عطر دا ایس طرح کاہنوں نقصان ہویا۔
۵۔کیوں جو اِہ عطر تن سو دینار تھوں ودھ دِک کے غریباں نُوں دِتّا جا سکدا سی۔تے اُہ اُہنوں جھڑکن لگے ۔
۶۔پر یِسُوع آکھیا اُہنوں چھڈدیو ۔کیوں اُہنوں دُکھ دیند ے ہو ۔اوس میرے نال اچھا ورتاوا کیتا ۔
۷۔کیوں جو غریب لوک ہمیش تُہاڈے نال نے تے جد چاہو اُہناں دا بھلا کر سکدے ہو ۔پر میں ہمیش تُہاڈ ے نال نہیں ہاں ۔
۸۔جو کجھ اُہدے تھوں بن پیا ۔اوس کِیتا ۔اوس پہلاں ئی میرے بدن اُتے میرے کفنان دفنان لئی عطرلا دِتا۔
۹۔پر میں تُہانُوں سچ آکھنا ہاں ۔پئی ساری دُنیا وِچ جِتھے کِتے انجیل دی منادی کیتی جائے گی اوتھے اِہدا بھی جو اوس کِیتا ہے اُہدی یادگاری دے لئی ذکر ہوئے گا ۔
۱۰۔تے یہوداہ اسکریوتی جہڑا بارہاں وچّوں اِک سی ۔سردار کاہناں دے کول ٹُر گیا۔تاں جو اُہنوں اُہنا ں دے حوالے کرے۔
۱۱۔اُہ اِہ سُن کے خوش ہوئے ۔تے اُہنوں روپے دین دا اقرار کیتا تے اُہ کھوج وِچ لگا ۔پئی کسے طرح دا لگے تے اُہنوں پھڑاودے ۔
۱۲۔تے پتیری روٹی دِی عید دے ویلے پہلے دن جدوں فسح ذبح کردے سان۔ اُہدے شاگرداں اُہنوں آکھیا تُوں کِتھے چاہنا ہیں پئی اَسِیں جا کے تیرے فسح کھان لئی تیاری کرئیے ۔
۱۳۔تے اوس اپنے شاگرداں وچوں دُونہہ نُوں گھلیا تے اُہناں نُوں آکھیا پئی شہر وچ جاؤ ۔تے اِک بندہ پانی دا گھڑا چکیا ہویا تُہانُوں ملے گا ۔اہدے مگر ٹر پو۔
۱۴۔تے جس گھر وچ اُہ جائے اوس گھر دے مالک نُوں آکھو اُستاد آکھدا ہے ۔میرے اُترن دا تھاں کِتھے ہے ۔جِتھے میں اپنے شاگرداں نال فسح کھانواں ۔
۱۵۔تے اُہ اِک موکلا چُبارہ فرش وچھایا تے سنواریا ہوئیا تُہانُوں وکھائیگا ۔اوتھے ساڈے لئی تیار کرو۔
۱۶۔تے شاگرد ٹر گئے ۔تے شہر وچ آئے تے جس طرح اوس دسیا سی ۔اوسے طرح ویکھا ۔تے فسح تیار کیتا ۔
۱۷۔جد شام ہوئی اُہ باراں دے نال آیا۔
۱۸۔تے جد اُہ بہہ کے کھان لگے ۔تاں یِسُوع آکھیا ۔میں تُہانُوں سچ آکھنا ہاں ۔پئی تُہاڈے وِچّوں اِک جہڑا میرے نال کھاندا ہے ۔مینُوں پھڑوائیگا۔
۱۹۔اُہ اُداس ہون تے اک اک کرکے اُہنوں آکھن لگے میں ہاں ؟
۲۰اوس اُہناں نُوں اکھیا باراں وچوں اِک جنا ۔جہڑا میرے نال تھال وِچ ہتھ پاندا ہے ۔سوئی ہے ۔
۲۱۔کیوں جو ابنِ آدم تاں جاندا ہے۔ جس طرح اُہدے حق وچ لکھیا ہے پر افسوس اوس آدمی اُتے جہدی راہیں ابن ِآدم پھڑوایا جاندا ہے ۔اوس آدمی لئی چنگا ہُندا جے اُہ نہ جمدا ۔
۲۲۔تے جد اُہ پے کھاندے سان اوس روٹی لئی تے برکت منگ کے توڑی ۔تے اُہناں نُوں دے کے آکھیا ۔لو اِہ میرا بدن ہے ۔
۲۳۔تے اوس پیالہ لے کے شکر کتیا ۔تے اُہناں نُوں دِتا ۔تے سبھناں اُہدے وچوں پیتا ۔
۲۴۔تے اوس اُہناں نُوں آکھیا ۔اِہ میرا عہد دا لہو ہے جہڑا بُہتیاں لئی وگایا جاندا ہے ۔
۲۵۔میں تُہانُوں سچ آکھنا ہاں پئی میں پھیر انگور دی رس کدے نہ پیاں گا ۔جس دن تیکر خدا دی بادشاہی وچ اُہ نواں نا پیواں ۔
۲۶۔پھیر اُہ خدا دی تعریف گاوندے زتیون دے پہاڑنُوں گئے ۔
۲۷۔تے یِسُوع اُہناں نُوں آکھیا پئی تُسِیں سارے ٹھوکر کھاوئے ۔تے کیوں جو لکھیا پئی میں ایالی نُوں ماراں گا تے بھیڈاں کھلر جان گیاں ۔
۲۸۔پر میں اپنے جی اُٹھن دے پچھوں تُہاتھوں اَگے گلیل نُوں جانگا ۔
۲۹۔تد پطرس اُہنوں آکھیا ۔بھانویں سارے ئی ٹھوکر کھان ۔پر میں نہیں کھاں گا ۔
۳۰۔تے یسو ع اُہنوں آکھیا میں تینُوں سچ آکھنا ہاں ۔پئی اج ایسے رات ککڑ دے دو وار بانگ دین تھوں پہلاں تُوں ترے وار میرا انکار کریں گا ۔
۳۱۔تد اوس بڑے جوش نال آکھیا ۔جے تیرے نال مینُوں مرنا پوے تاں بھی کدے تیرا انکار نہ کراں گا ۔تے سارے ایسے طرح آکھن لگے۔
۳۲۔پھیر اُہ گتسمنی ناں اِک تھاں آئے ۔تے اوس اپنے شاگرداں نُوں آکھیا ۔جد تیکر میں دُعا منگا ں تُسِیں ایتھے بیٹھے رہو۔
۳۳۔تے پطرس تے یعقوب تے یوحنانُوں اپنے نال لیا ۔تے حیران پریشان تے بہت دلگیر ہون لگا ۔
۳۴۔تے اوس اُہناں نُوں آکھیا ۔میرا جی بہت اُداس ہے ۔سگوں مرن وانگر حال ہے ۔تُسِیں ایتھے ٹھیرو تے جاگدے رہو ۔
۳۵۔تے اُہ تھوڑا اگے ودھ کے زمین اُتے ڈِگ پیا ۔تے دُعا منگی ۔پئی جےہو سکے اِہ گھڑی میتھوں ٹل جائے ۔
۳۶۔تے اوس آکھیا ۔ابّا یعنی اے باپ سب کجھ تیتھوں ہو سکدا ہے ۔ایس پیالے نُوں میرے کولوں ہٹا دہ ۔پر اُہ نا ہووے جو میں چاہناہاں۔سگوں اُہ جو تُوں چاہنا ہیں ۔
۳۷۔پھیر اُہ آیا ۔تے اُہناں نُوں سُتّے ہوئے ویکھیا ۔تے پطرس نُوں آکھیا ۔شمعون تُوں سونا ہیں ؟ تیتھوں اِک گھڑی بھی جاگن نہیں ہویا۔
۳۸۔جاگو تے دعا منگو پئی تُسِیں ازمائش وچ نا پوو ۔رُوح تے تیار ہے پر بدن کمزور ہے ۔
۳۹۔تے اُہ پھیر گیا تے اُہو گل آکھ کے دعا منگی ۔
۴۰۔تے پھیر آکے اوس اُہناں نُوں سُتیاں ویکھیا کیوں جو اُہناں دِیاں اَکھیاں نیندر نال بھرریاں ہویاں سان ۔تے اُہ جاندے سان پئی اُہنوں کیہ جواب دین ؟
۴۱۔تے اُہ تریجی وار آیا ۔تے اُہناں نُوں آکھیا ۔ہُن سُتّے رہو ۔تے آرام کرو ۔بس ہُن ویلا آگیا ہے ویکھو ابنِ آدم گنہ گاراں دے حوالے کیتا جاندا ہے ۔
۴۲۔اُٹھوچلئے ۔ویکھو میرا پھڑان والا نیڑے آیا ہے ۔
۴۳۔تے جدوں اَجے اُہ بولدائی سی ۔اوسے ویلے یہُودا جہڑا باراں وچوں اِک سی آگیا ۔تے سردار کاہناں تے فقیہاں تے بزرگاں ولوں اِک بھیڑ تلواراں تے لاٹھیاں لئی ہوئی اُہدے نال سی ۔
۴۴۔تے اُہدے پھڑان والے نے اُہناں نُوں اِہ پتہ دِتّا سی ۔پئی جہنُوں میں چماں ۔اُہو ہے ۔اُہنوں پھڑ کے تگڑائی نال لے جاؤ۔
۴۵۔سو جد اُہ آگیا ۔اونویں اُہدے کول آکے آکھیا ۔اے ربّی تے اُہنوں چُم لیا ۔
۴۶۔تد اُہناں اہدے اتے ہتھ پائے تے اہنُوں پھڑلیا ۔
۴۷۔تے اہناں وچوں جِہڑے اوتھے کلوتے سان ۔اک نے اپنی تلوار کھچ لئی تے سردار کاہن دے نوکر نُوں ماری ۔تے اہدا کن اڈا دتا ۔
۴۸۔تے یِسُوع اہناں نُوں آکھیا ۔پئی تلواراں تے لاٹھیاں لے کے تُسِیں مینُوں چور وانگوں پھڑن نکلے ہو؟
۴۹۔میں تے روز ہیکل وِچ تُہاڈے کول ساں ۔تے تعلیم دیندا ساں ۔تے تُساں مینُوں نا پھڑیا ۔پر اِہ ایس لئی ہویا۔پئی نوشتے پورے ہوجان ۔
۵۰۔تےسارے اُہنوں چھڈکے بھج گئے ۔
۵۱۔تے اِک جوان جس ململ دا کپڑا اپنے ننگے بدن اُتے لیا ہویا سی ۔اُہدے مگر ٹُر پیا ۔تے لوکاں اُہنوں پھڑیا ۔
۵۲۔پر اُہ کپڑا چھڈ کے ننگا بھج گیا۔
۵۳۔تے اُہ یِسُوع نُوں سردار کاہن دے کول لے گئے تے سردار کاہن تے بزرگ تے فقیہہ اُہدے کول اکٹھے ہوئے ۔
۵۴۔تے پطرس دُوروں اُہدے پچھے پچھے سردار کاہن دے دیوان خانے دے اندر تیکر ٹر گیا ۔تے پیادیاں دے نال بہہ کے اَگ سیکن لگا۔
۵۵۔تے سردار کاہن تے ساری مجلس یِسُوع اُتے اُہنوں مارن لئی گواہی لبھدے سان پر نہ لبھی ۔
۵۶۔بُہتے اُہدے اتے جھوٹھے گواہ بھکتے ۔پر اُہناں دی گواہی رَلدی نہیں سی ۔
۵۷۔تے کئیاں اُٹھ کے اِہ آکھ کے اُہدے اُتے گواہی دِتی۔
۵۸۔پئی اساں اُہنوں اِہ آکھدیاں سُنیاں پئی میں ایس ہیکل نُوں جہڑی ہتھ نال بنائی ہوئی ہے ڈھا دیاں گا ۔تے تِناں دِناں دے اندر اندر اک ہور نُوں بناں گا ۔
۵۹۔جہڑی ہتھاں دی بنائی ہوئی نہ ہووے ۔تد بھی اُہناں دی گواہی اِکوجہی نا سی ۔
۶۰۔تے سردار کاہن وچگھار کھلوگیا تے یِسُوع نُوں اِہ پچھیا ۔پئی تُوں کُجھ جواب نہیں دیندا ؟اِہ تیرے اُتے کیہ گواہی دیندے نے ؟
۶۱۔پر اُہ چپ ئی کررہیا ۔تے کجھ جواب نہ دِتا ۔سردارکاہن نے پھیر اُہنوں پچھیا ۔تے اُہنوں آکھیا ۔تُوں مسیح ہیں۔اوس مبارک دا بیٹا ؟
۶۲۔یِسُوع آکھیا۔ میں ہاں ۔تے تُسِیں ابن آدم نُوں قدرت دے سجے ہتھ بیٹھیاں ہویاں تے بدلاں نال آوندیاں ویکھو گے ۔
۶۳۔تے سردار کاہن اپنے کپڑے پاڑ کے آکھیا ۔بس ہن سانُوں ہورناں گواہاں دی کیہ لوڑ ہے ؟
۶۴۔تُساں کُفر سُنیا ۔تُہانُوں کیہ معلوم ہُندا ہے ؟تد اُہناں سبھناں اُہنوں موت دے لائق ہون دا فتوےٰ دِتا ۔
۶۵۔تد کئی اُہدے اُتے تھکن تے اُہدے منہ ڈھکن ۔تے اُہنوں دھپھے مارن تے اُہنوں آکھن لگے ۔نبوت نال دس۔تے پیادیاں اُہنوں چپیڑاں مار کے پھڑلیا ۔
۶۶۔تے جاں پطرس ہیٹھاں دیوان خانے وچ سی ۔سردار کاہن دِیاں گولیاں وچوں اک آئی ۔
۶۷۔تے پطرس نُوں اَگ سکیدیاں ویکھ کے اُہدے ول نظر کیتی تے آکھیا تُوں بھی یِسُوع ناصری دے نال سائیں ۔
۶۸۔پر اُہ مُکر کے بولیا ۔میں نا جاندا نا سمجھنا ہاں ۔پئی تُوں کیہ آکھنی ہیں تے اُہ باہر و ہڑے وچ ٹُر گیا۔تے کُکڑ بانگ دِتی ۔
۶۹۔تے گولی اُہنوں ویکھ کے پھیر اُہناں نُوں جِہڑے کول کھلوتے سان آکھن لگی ۔اِہ اُہناں وچوں اِک ہے ۔
۷۰۔پر اُہ پھیر مکر گیاتے پھیر تھوڑے چر پچھوں جِہڑے کول کھلوتے سان اُہناں پطرس نُوں آکھیا ۔ٹھیک تُوں اُہناں وچوں ہیں کیوں جو تُوں گلیلی ہیں۔
۷۱۔پر اُہ لعنت کرن تے سونہہ کھان لگا ۔پئی میں اوس بندے نُوں ۔جہدی گل تُسِیں کردے ہو نہیں جاندا ۔
۷۲۔تے اُدنویں ککڑ دوجی واری بانگ دِتّی تے پطرس نُوں اُہ گل یاد آئی جہڑی یِسُوع اُہنوں آکھی سی ۔پر کُکڑ دے دو وار بانگ دین تھوں پہلاں تُوں ترے وار میرا انکار کریں گا تے اُہ اوس گل نُوں سوچ کے رون لگا ۔

۱۔تےسویرے ئی سردار کاہناں تے بُزرگاں فقیہاں نُوں اپنے نال رَلا کے تے ساری مجلس نے صلاح کر کے یِسُوع نُوں بدھا ۔تے اُہنوں لے جا کے پیلاطس دے حوالے کیتا ۔
۲۔تے پیلاطس اُہدے تھوں پُچھیا ۔یہودیاں دا بادشاہ تُوں ہیں ؟ اوس اُہنوں جواب دِتا ۔تُوں آپے آکھ دِتّا ہے ۔
۳۔تے سردار کاہناں اُہدے اُتے بہت نالشاں کیتیاں۔
۴۔پیلاطس اُہنوں پھیر پچھیا پئی تُوں کجھ جواب نہیں دیندا ؟ویکھ اُہ تیر ے اُتے کِنیاں نالشاں کردے نے ۔
۵۔پر یِسُوع پھیر کُجھ جواب نہ دِتّا ۔اِتھوں توڑی پئی پیلاطس تعجب کیتا ۔
۶۔تے اُہ عید اُتے اِک قیدی جِہدے لئی اُہ عرض کرن۔اُہناں دی خاطر چھڈد ا ہُندا سی ۔
۷۔تے بّرابا ناں اک جنا قیدے پیا ہویا سی ۔اُہناں فسادیاں دےنال جنہاں فساد وِچ خُون کیتا سی ۔
۸۔تے لوک نیڑے جاکے عرض کرن لگے پئی دستور موجب ساڈے لئی کر۔
۹۔پیلاطس اُہناں نُوں جواب دتا ۔پئی تُسِیں چاہندے ہو پئی میں یہودیاں دے بادشاہ نُوں چھڈ دیاں ۔
۱۰۔کیوں جو اوس معلوم کیتا پئی سردار کاہناں کھار دے ماریاں اُہنوں حوالے کیتا سی ۔
۱۱۔پر سردار کاہناں لوکاں نُوں چُکیا پئی بّرابا نُوں ہی اُہناں دی خاطر چھڈ دیوئے ۔
۱۲۔تد پیلاطس مُڑ اُہناں نُوں آکھیا ۔پھیر جہنُوں تُسِیں یہودیاں دا بادشاہ آکھ دے ہو ۔اُہدے نال میں کیہ کراں ؟
۱۳۔اُہ پھیر اُچی اُچی آکھن لگے اُہنوں صلیب اُتے چاڑھ ۔
۱۴۔پیلاطس اُہناں نُوں آکھیا کیوں ۔اوس کِیہ برائی کیتی ہے ؟ ۔پر اُہ ہور بھی زور نال بولے اُہنوں صلیب اُتے چاڑھ ۔
۱۵۔تد پیلاطس ایس اردے نال پئی لوکاں نُوں راضی کرے بّرابا نُوں اُہناں دے لئی چھڈ دِتا ۔تے یِسُوع نُوں کوٹڑے مروا کے حوالے کیتا ۔پئی صلیب اُتے چاڑھیا جائے ۔
۱۶۔تے سپاہی اوس دیوان خانے وچ جہڑا حاکم دی کچہری ہے۔ اُہنوں لے گئے ساری پلٹن نُوں سد کے اِکٹھا کیتا ۔
۱۷۔تےاُہناں اُہنوں لال کپڑے پائے تے کنڈیاں دا تاج بنا کے اُہدے سِر اُتے رکھیا ۔
۱۸۔تے اُہنوں سلام کرن لگے ۔پئی یہودیاں دے بادشاہ سلام ۔
۱۹۔تے اُہ اُہدے سر اُتے کانے ماردے ۔تے تھکدے تے گوڈے نوا کے اُہنوں متھا ٹیکدے رہے ۔
۲۰۔تے جد اُہدے نال ٹھٹھے کر لئے تاں اُہدے تھوں لال کپڑے لاہ لئے ۔تے اُہدے اپنے کپڑے اُہنوں پا دِتّے۔تے اُہنوں صلیب اُتے چاڑھن لئی باہر لے گئے ۔
۲۱۔ تے اُہناں سکندر تے روفس دے پیو شمعون ناں اِک کُرینی بندے نُوں جہڑا پنڈوں آوندیاں اوتھوں دی پیالنگھدا سی ۔بیگار پھڑیا ۔پئی اہدی صلیب چک کے لے چلے ۔
۲۲۔تے اُہ اُہنوں اِک تھاں ۔گلگتھا ناں جِہدا مطلب کھوپری دا تھاں ہے ۔لے آئے ۔
۲۳تے اُہنوں انگور دِی رَس مُرنال ملائی ہوئی دین لگے ۔پر اوس نہ لیا ۔
۲۴۔تےاُہنوں صلیب اُتے چاڑھیا ۔تے اُہدے کپڑے ونڈن لئی گُنےپائے پئی کہنُوں مِلن ۔
۲۵۔تے پہردِن چڑھیاسی تے اُہناں اُہنوں صلیب اُتے چاڑھیا ۔
۲۶۔تےاُہداالزام اُہدے اُتے اِہ لکھیا ہویا سی ۔یہودیاں دا بادشاہ ۔
۲۷۔تے اُہناں اہدے نال دو ڈاکو اِک نُوں اُہدے سجے تے اِک نُوں اُہدے کھبے ہتھ صلیب اُتے چاڑھیا ۔
۲۸۔تے فیراو نوشتہ پورا ہویا پئی او گناگاراں وچ گنیاگیا ۔
۲۹۔تے آون جان والیاں اُہنوں منہا ماریا ۔تے سرہلا کے آکھیا ۔واہ تُوں جہڑاہیکل نُوں ڈھانا تے ترے دِناں وچ بنانا ہیں ۔
۳۰۔اپنے آپ نُوں صلیبوں اُتر کے بچا لے ۔
۳۱۔ایسے طرح سردار کاہن بھی آپو وچ فقیہاں نال مِل کے ٹھٹھہ مار کے آکھن لگے ۔ایس ہورناں نُوں بچایا ۔اپنے آپ نُوں نہیں بچا سکدا ہے ۔
۳۲۔اسرائیل دا بادشاہ مسیح ہُنے صلیبوں ہیٹھا ں اُتّر آوے ۔تاں اَسِیں ویکھئے ۔تےایمان لیائیے ۔تے جِہڑے اُہدے نال صلیب اُتے چاڑھے گئے اُہنوں مہنے ماردے سان ۔
۳۳۔تے دو پہر دے ویلے سارے دیس اُتے ہنھیرا ہوگیا ۔تے ترجے پہر تیکر رہیا۔
۳۴۔تے تریجے پہر نُوں یِسُوع اُچی آواز نال پکاریا ایلوہی ایلوہی ۔لماسبقتنی ۔جہدا مطلب اِہ ہے ۔اے میرے خُدا
۱ے میرے خدا !تُوں منیوں کیوں چھڈ دِتا ہے ۔
۳۵۔تے کئی اُہناں وِچّوں جِہڑے نیڑے کھلوتے سان ۔اِہ سُن کے آکھن لگے ۔ویکھو ۔اوہ ایلیاہ نُوں آواز مار دا ہے ۔
۳۶۔تے کسے دوڑ کے اسپنچ نُوں سِرکے نال بھیئوں کے اِک کانے نال بدھا ۔تے اِہ آکھ کے اُہنوں چُپایا ۔پئی رہن دے ویکھئےایلیاہ اُہنوں اُتارن لئی آوندہے کہ نہیں ۔
۳۷۔تد یِسُوع اُچی آواز نال دم دے دِتا ۔
۳۸۔تے ہیکل دا پردہ اُتّوں لے کے ہیٹھاں تیکر پاٹ گیا ۔
۳۹۔تے اوس صوبے دار جہڑا اُہدے سامنے کول کھلوتا سی جاں ویکھیا پئی اوس ایوں دم دِتا ۔تاں آکھیا ۔ٹھیک اِہ خدا دا ئی بیٹا سی ۔
۴۰۔تے کئی عورتاں دُوروں ویکھددیاں سان ۔اُہناں وچوں مریم مگدلینی ۔تے نِکے یعقوب تے یوسس دی ماں مریم ۔تے سلومی سی ۔
۴۱۔جدوں اُہ گلیل وِچ سی اِہ اُہدے مگر ٹردیاں تے ٹہل کردیاں ہُندیاں سان تے ہور بھی بُہتیریاں جہڑیاں یروشلیم نُوں اُہدے نال آیاں سان۔
۴۲۔تے جاں لوہڈا ویلا ہویا ۔ایس کر کے پئی اُہ تیاری دا دن سی ۔جہڑاسب تھوں پہلے ہندا ہے ۔
۴۳۔تاں یوسف ارمتیا دا اک نامی صلاح کار جہڑا آپ بھی خدا دی بادشاہی دی اڈیک وچ سی آیا ۔تے بے دھڑک پیلاطس کول اندر گیا ۔تے یِسُوع دی لوتھ منگی ۔
۴۴۔پیلاطُس حیران ہویا ۔پئی ایڈی چھیتی اُہ کِتھوں مرگیا تے صوبے دار اں نُوں سد کے پچھیااُہنوں مریاں کجھ چر ہوگیا ؟
۴۵۔تے صوبے دار کولوں معلوم کر کے لوتھ یوسف نُوں دوا دِتّی ۔
۴۶۔اوس ململ دا کپڑا مُل لیا تے لوتھ نُوں اُتار کے ململ وچ وھلیٹ کے کفنایا ۔تے اِک قبر وچ جہڑی پتھر وچ کھدوائی گئی سی اُہنوں دفنایا ۔تے قبر دے منہ اُتّے اِک پتھر ریڑھ کے رکھ دِتّا ۔
۴۷۔مریم مگدلینی ۔تے مریم یوسس دِی ماں اوس تھاں نُوں جِتھے اوہ دفنایا گیا سی ویکھدیاں سان ۔

۱۔تے جد سبت دا دِن گزرگیا ۔تاں مریم مگدلینی تے یعقوب دی ماں مریم تے سلومی نے خوشبو والیاں چیزاں مُل لیاں ۔پئی جاکے اُہدے اُتے ملن ۔
۲۔تے ہفتے دے پہلے دِن بہت سویرے سورج چڑھدیاں ئی اُہ قبر اُتے آئیاں ۔
۳۔تے آپو وچ آکھدیاں سان ۔پئی ساڈے لئی پتھر نُوں قبر د ے مونہوں کون ریڑھ کے لانبھے کرے گا ؟
۴۔تے جد اُہناں نگاہ کیتی تاں اوس پتھر نُوں لانبھے ریڑھیا ہویا ڈٹھا ۔پئی اُہ بہت بھارا سی ۔
۵۔تے قبر وچ جا کے اُہناں اک جوان نُوں چٹے کپڑے پایاں ہویاں سجے پاسے بیٹھا ویکھیا ۔
۶۔تے اُہ گبھرا گیا ں ۔اوس اُہناں نُوں آکھیا ۔نا گھبراؤ تُسِیں یِسُوع ناصری نُوں جہڑا صلیب اُتے چاڑھیا گیاسی لبھدیاں ہو ۔اُہ تے جی اُٹھیا ہے ۔اُہ ایتھے نہیں ہے ویکھو اِہ اُہ تھاں ہے۔جِتّھے اُہناں اُہنوں رکھیا سی ۔
۷۔پر جاؤ اُہدے شاگرداں تے پطرس نُوں آکھو پئی اُہ تُہاتھوں اَگے گلیل نُوں جاندا ہے۔ تُسِیں اوتھے اُہنوں ویکھو گے ۔جس طرح اوس تُہانُوں آکھیا سی ۔
۸۔تے اُہ نکل کے قبر کولوں نَسیاں ۔ کیوں جو اُہ کنبدیاں تے گھابردیاں سان تے ڈردیاں ماریاں کِسے نُوں کجھ نہ آکھیا ۔
۹۔ تے ہفتے دے پہلے دن اوس سویرے اُٹھ کے پہلاں مریم مگدلینی نُوں جہدے وِچّوں اوس ست بدرُوحاں نُوں کڈھیا سی وِکھالی دِتّی ۔
۱۰۔اوس جا کے اُہدے ساتھیاں نُوں جِہڑے غم کردے تے روندے سان خبر دِتّی ۔
۱۱۔تے اُہناں اِہ سُن کے پئی اُہ جیوندا ہے تے اُہنوں وِکھالی دِتّی ۔سچ نہ منیا ۔
۱۲۔اُہدے پچھوں اوس ہور روپ وچ اہناں وچوں دو جنیاں نُوں جد اُہ پینڈاکردیاں پنڈاں وِچ لگے جاندے سان وکھالی دِتّی ۔
۱۳۔تے اُہناں جا کے باقی دِیاں نُوں خبر دِتّی پر اُہناں دا بھی سچ نہ منیا ۔
۱۴۔ایدوں پچھے اوس یارہاں نُوں جد اُہ کھان بیٹھے سان وکھالی دِتّی تے اہناں دی بے یقینی تے سخت دلی دا اُلاہماں دِتّا ایس لئی پئی جنہاں اُہنوں جی اُٹھیاں ہویا ویکھیا سی ۔اُہناں لوکاں دا اُہناں سچ نہ منیا ۔
۱۵۔تے اوس اُہناں نُوں آکھیا ۔تُسِیں ساری دُنیاوِچ جا کے ساری خلقت دے اَگے انجیل دی منادی کرو ۔
۱۶۔جِہڑا ایمان لیاوندا تے بپتسمہ پاندا ہے سوئی نجات پاوے گا ۔تے جہیڑا ایمان نہیں لیاوندا۔اُہ مجرم کیتا جاوے گا ۔
۱۷۔تے ایمان لیاون والیاں وچ اِہ معجزے ہون گے ۔پئی اُہ میراناں لے کے بد رُوحاں نُوں کڈھن گے ۔تے نِویاں نِویاں بولیاں بولن گے ۔
۱۸۔اُہ سپاں نُوں چُک لَین گے تے جے کُجھ زہر والی چیزپی بھی لین تاں اُہناں دا کجھ نہیں وِگڑےگا ۔اُہ روگِیاں اُتے ہتّھ رکھن گے ۔تے اُہ چنگے ہو جان گے ۔
۱۹۔پھیر خداوند یِسُوع اُہناں نال کلام مُکا کے اَسمان اُتے اٹھالیا گیا ۔تے خدا دے سجے ہتھ جا بیٹھا ۔
۲۰۔تے اُہناں باہر جا کے ہر تھاں منادی کیتی ۔تے خداوند اُہناں دے نال ہو کے کم کردا تے کلام نُوں اُہناں معجزیاں دے راہیں جِہڑے نال نال ہُندے سان ثابت کردا سی ۔
آمین